УИХ-ын өнөөдрийн чуулганаар Монгол Улс, Олон улсын хөгжлийн ассоциаци хоорондын нэмэлт санхүүжилтийн хэлэлцээр "Монгол Улсад КОВИД 19-аас урьдчилан сэргийлэх, хариу арга хэмжээ авах, бэлэн байдлыг хангах төсөл"-ийг соёрхон батлах тухай хуулийн төслийг хэлэлцэж байна. Хэлэлцэж байгаа асуудалтай холбогдуулан гишүүд асуулт асууж, хариулт авч байна. 

УИХ-ын гишүүн Д.Ганбат: Зээл авах гээд хуулийн төсөл оруулж ирж байна. Энэ мөнгөөр вакцин авна гэж ойлголоо. Яг ямрыг нь авах вэ,  мэдээж ДЭМБ-аар баталгаажсан вакцин оруулж ирэх үү. Эхний тун хийлгэсэн 500 гаруй хүн халдвар авсан байна.. 

Сангийн сайд Б.Жавхлан: Төсөв батлах үеэр аль ч вакцин ДЭМБ-аар баталгаажаагүй,  үнэ нь тодорхойгүй байсан. Одоо ч вакцины үнэ харилцан адилгүй байна. Бид хоцроогүй, Азидаа вакцинжуулалтаар эхний тавд яваа. Бид хүн амынхаа 10 хувь буюу 330 мянган хүнд, зорилтод 60 хувийнхаа бараг 20 хувийг вакцинд хамруулаад байна. Төсөв мөнгөгүй болчихоод зээл авч байгаа юм биш.

Вакцины эхний тунгаа хийлгэсэн 500 гаруй хүн халдвар авсан нь үнэн. Гэхдээ энэ бол зөвхөн манайд тохиолдож байгаа биш. Яг ямар вакцин оруулж ирэх талаар гэрээ хэлэлцээрийг хийж байна. Өнөөдөр БНХАУ-ын Синофарм үйлдвэрийн Вероселл вакцины 300 мянган тун, энэ сарын 9-нд 600 мянган тун бууна. Хоёр удаагийн татан авалтаар БНХАУ-ын Вероселл вакцины 900 мянган тунг авна.

У.Тэргэл