Монгол Улсын Ерөнхийлөгчийн Тамгын газар 2020 оны  арваннэгдүгээр сараас хойш ОХУ-д албан ёсны айлчлал хийх хүсэлтийг Монголын Гадаад харилцааны яаманд удаа дараа тавьсан ч одоог хүртэл тоймтой хариу авч чадаагүй байгаа аж.

Тиймээс хариу хүлээж цөхөрсөн Монгол Улсын Ерөнхийлөгчийн Тамгын газрын дарга Ө.Шижир нь ОХУ-ын Ерөнхийлөгчийн ЕТГ-ын дарга А.В.Вайнод айлчлалын асуудлаар албан захидал хүргүүлсэн боловч өнөөдрийг хүртэл мөн тодорхой хариу аваагүй аж. Энэ талаар холбогдох эх сурвалжуудаас тодруулахад, 2018 оны арванхоёрдугаар сард хийсэн Монгол Улсын Ерөнхий сайдын албан ёсны айлчлалаар хоёр тал гол асуудлаа тохиролцсон учраас ОХУ-ын Ерөнхийлөгч Монгол Улсын Ерөнхийлөгчтэй биечлэн уулзах шаардлагагүй гэсэн байр суурийг Гадаад хэргийн сайд С.Лавров Монголын Гадаад харилцааны сайдтай утсаар ярих үедээ илэрхийлсэн байна.

Монгол Улсад энэ оны зургаадугаар сард Ерөнхийлөгчийн сонгууль болох ба одоогийн Ерөнхийлөгч Х.Баттулга нэр дэвшихээ зарлаад байгаа. Харин АН-ын дарга С.Эрдэнэ хэвлэлд өгсөн ярилцлагадаа, одоогийн ерөнхийлөгч хууль шүүхийн байгууллагыг хувийн зорилгоор ашигладаг, өөрт нь болон охинд нь эрүүгийн хэрэг үүсгэн дарамталсан, мөрийн хөтөлбөрөө хэрэгжүүлээгүй гэх шалтгаанаар намаасаа дахин нэр дэвшүүлэх боломжгүй гэж зарласан билээ.

 Мөн 2019 онд баталсан Үндсэн хуулийн өөрчлөлтөөр одоогийн Ерөнхийлөгч дахин нэр дэвших эрхгүй гэсэн маргаан Үндсэн хуулийн Цэцэд өрнөөд байгаа юм. Х. Баттулга нь 2017 онд Ерөнхийлөгчөөр сонгогдохдоо улстөрчдийг гадаад улсад данс, компанитай байхыг хорьж, гаднаас их хэмжээний мөнгө оруулж ирэн иргэдэд тараана гэх амлалт өгөн сонгогдсон. Гэтэл өнгөрсөн оны сүүлчээр түүний зүүн өмнөд Ази дахь нууц компаниудын баримт, гадныханд зарсан олон тооны ашигт малтмалын ордын наймаа илэрч, олны дунд шуугиан тарьсан юм.

Мэргэжилтнүүдийн зүгээс Х.Баттулгын энэ мэт мухардмал байдал нь түүний ОХУ-д хийхээр төлөвлөсөн айлчлалын хувь заяанд нөлөөлж байгаа гэж үзэж байна.

У.Тэргэл