Улсын Онцгой комиссын Шуурхай штабын дарга Ж.Чүлтэмсүрэнг үүрэгт ажлаас нь чөлөөлжээ. Харин түүний оронд ОБЕГ-ын дэд дарга, хурандаа Ц.Ганзоригийг томилжээ. 

Ж.Чүлтэмсүрэнг ажлаас нь чөлөөлсөн шалтгаан одоогоор тодорхойгүй байгаа. Эх сурвалжийн мэдээлж буйгаар түүнийг Улсын онцгой комиссын ажилчдыг ОБЕГ-ын харьяа Жаргалант сувилалд амраахдаа халдвартай мөртлөө шинжилгээний бичиггүй ажилтныг явуулж бусдыг эрсдэлд оруулсан, өнгөрсөн сарын 24-ны өдөр Сөүл-Улаанбаатарын тусгай үүргийн иргэнээр ирсэн хамаатнаа тусгаарлалтад оруулалгүйгээр хөдөө, орон нутаг руу явуулж ажлын хариуцлага алдсан, Шадар сайд С.Амарсайханы эхнэр Ч.Ичинхорлоог улаан бүсээс шууд гаргасан зэрэг асуудлаас үүдэж үүрэгт ажлаас нь чөлөөлсөн байх магадлалтай аж.

Харин түүний оронд ОБЕГ-ын дэд дарга, хурандаа Ц.Ганзоригийг томилсон. Ц.Ганзоригийн товч намтарыг танилцуулж байна.   

Боловсрол:

• 1999-2003 онд Улаанбаатарын Их Сургуулийг хими-технологич мэргэжлээр,
• 2003-2005 онд Улаанбаатарын Их Сургуулийг хими-технологийн магистр,
• 2006 онд Батлан хамгаалахын их сургуулийн Цэргийн дээд сургуулийн Химийн цэргийн командын офицер,
• 2007-2010 онд Томас Бата Их Сургуулийг докторын зэрэгтэй /Ph.D/ тус тус төгссөн.

Ажилласан байдал:

• 2003-2010 онд Шинжлэх ухааны академид эрдэм шинжилгээний ажилтан,
• 2011-2014 онд Гамшиг судлалын хүрээлэнд судлаач-химич,
• 2014-2015 онд Бодлого төлөвлөлт хамтын ажиллагааны газарт Стратегийн бодлого төлөвлөлтийн хэлтсийн дарга,
• 2015 оны 01 сараас 07 сар хүртэл  Бодлого төлөвлөлт, хамтын ажиллагааны газрын дарга,
• 2015 оны 07 сараас Онцгой байдлын ерөнхий газрын дэд даргаар тус тус ажиллаж байна.