Эрүүл мэндийн салбарт шинэчлэл хийх хүрээнд УИХ-ын гишүүн Ж.Чинбүрэн дараах саналыг өөрийн цахим хуудсаараа дамжуулан бичжээ. 

Тэрбээр "Коронавируст халдварын цар тахалтай галын шугамд тэмцэж буй салбарынхан та бүхэн минь шантралгүй ард иргэддээ тусламж үйлчилгээг үзүүлж буйд Та бүхнээрээ бахархаж байна. Цагаан нөмрөгтөн Та бүхний уйгагүй хөдөлмөр, зүтгэлээр иргэдээ дархлаажуулж, цар тахлыг даван туулахад тун ойрхон байна.

УИХ-ын 2020 оны ээлжит сонгуулийн үр дүнд УИХ-д эрүүл мэндийн салбарт ажиллаж байсан мэргэжлийн эмч нар сонгогдож, Засгийн газарт мөн мэргэжлийн эмч сайд томилогдон ажиллаж байна.

Эрүүл мэндийн салбарынхан та бүхнээс эрүүл мэндийн салбарт реформ хийх их хүлээлт байгааг гүнээ ойлгож, ухамсарлаж байгаа.

УИХ-ын Тамгын газрын Парламентын судалгааны хүрээлэнгийн судлаачдаар хэд, хэдэн хуулийн төсөлд судалгаа хийлгэж амжлаа. Нилээдгүй олон төрийн бус байгууллагуудыг хүлээн авч уулзлаа.

Монгол Улсын Засгийн газрын 2020-2024 оны үйл ажиллагааны хөтөлбөр, Монгол Улсыг 2021-2025 онд хөгжүүлэх таван жилийн үндсэн чиглэлд эрүүл мэндийн салбарт хийж хэрэгжүүлэх нэлээдгүй олон ажлыг тусгууллаа.

Эрүүл мэндийн салбарт ажиллаж буй эмч, сувилагч, ажилтнуудыг Улсын Их Хурал, Засгийн газар шууд хүлээн авч уулздаг, санал, санаачлага, хүндрэл бэрхшээлийг нь сонсдог тогтолцоог бүрдүүлэх эхний бодит ажил 2021 оны 3 сарын 30-ны өдөр “Эмч, эмнэлгийн ажилтнуудаа сонсоё” цахим уулзалтаар эхэллээ.

Тус уулзалтад УИХ-ын дарга Г.Занданшатар, УИХ-ын Нийгмийн бодлогын байнгын хорооны дарга М.Оюунчимэг, УИХ-ын гишүүн Б.Бейсен, Н.Ганибал болон миний бие, Эрүүл мэндийн сайд С.Энхболд, ЭМДЕГ удирдлагын багаараа оролцож, Монгол Улсын 4 зүг, 8 зовхист ажиллаж, амьдарч буй 21 аймгийн Эрүүл мэндийн газар, Нэгдсэн эмнэлэг, сумын болон өрхийн эрүүл мэндийн төв, нийслэлийн төрөлжсөн болон нэгдсэн эмнэлэг, өрхийн эрүүл мэндийн төв, хувийн хэвшлийн эрүүл мэндийн байгууллагууд гээд нийтдээ 450 орчим байгууллагын эмч, ажилтнуудыг цахимаар хүлээн авч уулзсан.

Тус цахим уулзалтад эрүүл мэндийн байгууллагууд маань саналаа хэлж, чатаар олон зуун санал ирүүлсэн байна. Сум орон нутгийн онцлогоос хамаарч хүндрэл бэрхшээл нь харилцан адилгүй байна.

Өнгөрсөн амралтын өдрүүдээр та бүхнийхээ санал, санаачилга, хүндрэл бэрхшээлийг нэг бүрчлэн уншиж танилцлаа. Нийтлэгээрээ дараах саналууд хамгийн их гарч байна.

1. Цалин нэмэх, амьдралд хүрэлцдэг болгох

2. Тэтгэвэрт гарах насыг багасгах

3. Хөдөө орон нутагт ажиллаж байгаа эмч, ажилтнуудыг түрээсийн орон сууцанд хамруулах, тогтвор суурьшилтай ажиллах боломжоор хангах

4. Жилд олон эмч нар төгсөж байгаа ч хөдөө орон нутаг эмч нарын хомсдолтой байгааг анхаарах

5. Эмнэлгийн жолооч, туслах сувилагч, тоног төхөөрмжийн инженер, засварчид, тогтооч, нярав, нягтлан бодогч нарт эмч, эмнэлгийн мэргэжилтэнтэй адил ажилласан жилийн урамшуулал олгодог болгох

6. Сумын эрүүл мэндийн төвүүдийн санхүүжилтийн асуудлыг анхаарах

7. Эмнэлэгт ажиллаж буй эмч, ажилтнуудыг орон сууцжуулах

8. Эмч, эмнэлгийн ажилтнуудыг урьдчилан сэргийлэх үзлэгт чирэгдэлгүй оруулах

9. Алслагдсан хөдөө, орон нутагт ажиллаж байгаа эмч, ажилтнуудыг тогтвор суурьшилтай ажиллуулах үүднээс ажиллах нөхцлийг дэмжих

10. Уламжлалт анагаах ухааныг хөгжүүлэх, хүртээмжийг нэмэгдүүлэх, орон тоог нэмэгдүүлэх

11. Сумдын барилгын шинэчлэл, техник тоног төхөөрөмжийн хангалт хийх, сумын эрүүл мэндийн төвд хэд хэдэн ажил хавсарч хийж байгааг болиулах, орон тоог нэмэгдүүлэх,

12. Эрүүл мэндийн даатгалын шинэчлэлийн асуудал

13. Эмч, эмнэлгийн ажилтнуудын хууль эрх зүйн орчин, ажиллах нөхцлийг сайжруулах, хөдөлмөрийн аюулгүй байдал, эрүүл ахуйн нөхцлийг сайжруулах

14. Эмнэлгийн мэргэжилтний эрх зүйн байдлын тухай боловсруулагдаж буй хуулийн төсөлтэй холбоотой саналууд хэлсэн байна.

Коронавируст халдвар цар тахалтай тэмцэх үйлсэд та бүхэн маш завгүй ажиллаж байгаа тул улс орон даяар вакцинжуулалт бүрэн дууссаны дараа 21 аймаг, нийслэлийн эмч, ажилтнуудаа хамруулан эрүүл мэндийн салбарт шаардлагатай байгаа хууль тогтоомжийг хамтдаа боловсруулж, хамтдаа хэлэлцүүлж, хамтдаа салбараа шинэчилье.

Та бидний амьдралаас урган гарсан хууль нь эрүүл мэндийн салбарын тулгамдаж буй асуудлуудыг шийдэж чадсан, урт настай хууль болж мөрдөгдөх ёстой. Иймд долоо хэмжиж нэг огтлох зарчмаар хуулийн шинэчлэлээ хамтдаа хийцгээе" гэжээ.