Гадаад харилцааны дэд сайд Б.Мөнхжингийн ажил, албаа залгуулдаг 0240 УНҮ дугаартай автомашинаар согтуу хүүхэн залуучуудыг зөөж, хэд хэдэн буудал ресторанаар орж гарсан бичлэг нийтэд ил боллоо. Цар тахлын нөхцөл байдал хүндэрсэн энэ үед төрийн, тэр дундаа дипломат албаны автомашинаар залуусын шоу, цэнгээнд үйлчилж явна гэдэг хэр ёс зүйтэй үйлдэл вэ.

Б.Мөнхжин дэд сайдын хувьд хийгүй нэгэн биш. Түүнийг Гадаад харилцааны дэд сайдад 2020 оны долоодугаар сарын 10-ны өдөр томилсон ба арван сар хүрэхгүйн хугацаанд дипломат албыг харлуулсан үйлдэл нэг бус удаа гаргасан юм.

Тухайлбал,  манай улс AstraZenece вакцины 112800 тун, Pfizer/BioNTechвакцинаас 25740 тунг COVAX хөтөлбөрийн хүрээнд хүлээн авахаар болж, эхний 14400 тун AstraZeneca вакциныг хүлээн авсан. Хүлээн авах арга хэмжээний үеэр томоохон хандивлагчдад талархсангүй хэмээн Европын холбооноос манай улсад суугаа Онц бөгөөд Бүрэн эрхт Элчин сайд дургүйцлээ илэрхийлсэн билээ. Гэтэл уг арга хэмжээнд Гадаад харилцааны яам талархал илэрхийлсэн ч албан мэдээндээ энэ талаар дурдаагүй нь ийн үл ойлголцлыг бий болгосон байдаг. Харин Гадаад харилцааны дэд сайд Б.Мөнхжин тухайн үед өөрийн твиттер хуудсаар дамжуулан үл хүндэтгэсэн, асуудлыг дэвэргэн талцуулахгүй байхыг уриалангаа талцуулсан мэдээлэл бичээд сууж байв.

Монголын улстөрд улиг болсон шар мэдээллийг дарж авдаг хар аргаа Гадаад харилцааны дэд сайд ингэж гадаад харилцааны бодлогод ашигласан нь асуудлыг улам хурцатгасан ч хэн ч түүнд хариуцлага тооцоогүй.

Өмнөх Ерөнхий сайд нь эмч нарын өмнөөс огцроод хариуцлага хүлээж огцорсон бол дэд сайд Б.Мөнхжин ёс бус үйлдэлдээ уучлал ч гуйлгүй өнгөрсөн.

Харин энэ удаагийн явуургүй, ёс зүйгүй үйлдэлдээ дэд сайд Б.Мөнхжин тайлбар хийхээс зайлсхийж, харин өмнөөс нь зарим нэгэн нь дэд сайдын автомашин эвдэрсэн үед ганц, нэг удаа дуудаж унаж байсан байж магадгүй хэмээв.  Тэгвэл дэд сайд өнөөдөр ч 0240 УНҮ дугаартай дипломат албаны автомашинаар гэрээсээ албан ажилдаа ирж буй дүр зураг ил болов.

Энэ удаад дэд сайд Б.Мөнхжингийн толгойг бас илээд өнгөрөөх үү, Ерөнхий сайд Л.Оюун-Эрдэнэ ээ.

Дэд сайд Б.Мөнхжин залуу хүний хувьд ажилдаа туршлагагүй байж болно. Харин дипломат албаны автомашинаар шөнөжингөө шоу цэнгэлд үйлчлэх нь ёс зүйн хэм хэмжээг ноцтой зөрчсөн үйлдэл гэдгийг ойлгохтойгоо нэгэн байлтай. Нөгөөтэйгүүр, дэд сайд Б.Мөнхжин дэн буудал руу машинаараа хүүхэн зөөлгөж байх үед Улаанбаатар хотод 23.00 цагаас хойш хөл хорьчихсон байсан үе. Өөрөөр хэлбэл, УОК, НОК-ынхон өдөрт хэдэн зуугаараа тоологдож байгаа коронавирусийн цар тахлын эсрэг тэмцэж байхад, төрийн дэд сайд нь тэрийг нь үл хүндэтгэж өөрийнхөө машинаар буудал, баарны хооронд хүн зөөлгөж байсныг юу гэж тайлбарлах вэ. УОК, НОК-ын шийдвэр эсвэл энгийн иргэдэд л үйлчилж, төрийн томчууд, тэр тусмаа дэд сайд Б.Мөнхжин мэтэд хамаагүй байдаг юм уу?

У.Тэргэл