Цэргийн албан дахь хүний эрхийн асуудлаар УИХ-ын Хүний эрхийн дэд хороо хуралдаж байна. Энэ үеэр гишүүд үг хэлж, асуулт асуулаа.

Ц.Анужин: Хохирогчийн ар гэрт 5 жилийн цалинтай тэнцэх нөхөн олговор олгоно гээд байгаа. Энэ яг хэдэн төгрөг вэ. Хүний амьдралд зэрлэг балмад этгэдийн гарт амь алдахаас илүү туулах олон зүйл бий. Гэтэл хүний амийг таван жилээр тооцоод нөхөн олговор олгоно гэж байгаад өөрчлөхгүй юм уу. Насаар нь тэтгээд явсан ч яах вэ дээ. Эсвэл амьдралд нь тааруулж хариулаад байгаа юм бэ. Бид хүний сайхан хүүг илүү сайхан эр хүн болгож, торгон хилээ хамгаалуулна гэж авч явсан.

Холбогдох улсууд ялаа аваад явна гээд байна. Энд хэн орох вэ.

Цэрэгт татахад сэтгэлзүйн асуудлыг судалж байна уу. Офицер, хороодын дарга нарт тавих шаардлага байна уу. Хүний сайхан үрийг татаж авчихаад гарын шүүс болгоод байгаа юм биш биз.

Зэвсэгт хүчний жанжин штабын дарга Д.Ганзориг: Хууль эрх зүйн хүрээнд тэтгэмжийн асуудлыг шийдвэрлэх ёстой. Мөнгөн дүнг хэлж чадахгүй байна. Ахлагчийн албан тушаалын дунджаар тооцно. Хүний амь насыг мөнгөөр хэмжих нь буруу. Монгол Улсын иргэн бол улсын үнэт зүйл гэдгийг мэдэж байгаа.

Холбогдох хүн гэдэгт салаан дарга болон тухайн үед ээлжинд гарч байсан бүх хүнийг төрийн албанаас чөлөөлсөн. Тухайн амь алдсан байлдагчийн эцэг эхэд хүнд тусаж байгааг ойлгож байна.

А.Сүх