Шадар сайд С.Амарсайхан Улсын Онцгой комиссыг толгойлоод хоёр сар гаруйн хугацаа өнгөрчээ. Энэ хугацаанд сайн ч, саар ч шийдвэр гаргасан хэмээн иргэд янз янзаар шүүмжлэн хэлэлцдэг юм. Мэдээж төрийн шийдвэр хүн бүрд таалагдахгүй. Тэгэх ч боломжгүй. Ер нь тэгээд ч амаргүй ажил даа. Хоёр сар гаруйн хугацаанд мөн чиг олон хэл аманд өртсөн.

Эрх мэдэлтэй байх хэцүү. Нөгөө талаар эрх мэдэлгүй байх ч бас хэцүү.

Үүний нэгэн жишээ бол эрсдэлтэй улаан бүс рүү гэргийгээ нэвтрүүлж хадмуудаа сахиулсан асуудал. Нөгөө нь гэвэл хэзээ мөдгүй тэнгэрт халих гэж буй өвчтэй хөгшин аав руугаа халдвар хамгааллын дэглэмээ барьж хэсэг хором ч болтугай уулзахыг гуйсан ч бүтээгүй “энэрэлгүй хорвоо” гээчийг харуулсан бас нэгэн явдал. ХӨСҮТ-ийн захирал асан Д.Нямхүү нэгдүгээр сарын 21-нд үүрэгт ажлаасаа чөлөөлөгдсөн. Мөн л хоёр сар гаруйн хугацаанд ХӨСҮТ хоёр захирлын гараар дамжиж, халаа сэлгээ ч үргэлжилсээр байна. Тодруулбал, Д.Нямхүү эмчийн орыг тус эмнэлгийн гүйцэтгэх захирлаар ажиллаж байсан Д.Наранзулаар залгуулсан ч удалгүй Л.Баттөрд шилжүүлсэн. Мөн дэд захирал зэрэг хэд хэдэн албан тушаалтныг сэлгэсэн бололтой. Ер нь ХӨСҮТ хөл хөдөлгөөнтэй байна.

Үүнийг Шадар сайд С.Амарсайхантай холбогдуулан тайлбарлах нэгэн ч бий.

Учир нь Шадар сайд тус эмнэлэгт ажиллах үеэрээ зарим албан тушаалтанг ажлаа өгөхийг шаардсан гэх албан бус мэдээлэл бий. Саяхан гэхэд УОК-ын Шуурхай штабын дарга Ж.Чүлтэмсүрэнг тодорхойгүй байдлаар нь үүрэгт ажлаас нь чөлөөлсөн. Зарим сурвалжуудын мэдээллээр түүнийг гэргийг нь ХӨСҮТ-д нэвтрээд гарахдаа тусгаарлагдаагүй талаар ам алдсан хэмээн “жавтийдсан” сурагтай. Шадар сайд С.Амарсайханы үед хаа сайгүй л хөл хөдөлгөөн ихтэй байх шиг байна. 

А.Сүх