Монгол Улсын Ерөнхийлөгч өөрийн томилдог, чөлөөлдөг албан тушаалдаа дуртай нэгнээ зүтгүүлж, бялуу хувааж байна. Энэ ч үүднээсээ ойрын зарим нэгнээ шүүгчийн албан тушаалд томилохоор болжээ. Тодруулбал,

Шүүхийн ёс зүйн хорооны дарга Тэрбишийн Мөнх-Эрдэнэ гэгч Шүүхийн тухай хуулийг боловсруулан,хэлэлцэн батлуулах бүрийд хамгийн чангаар дургүйцлээ илэрхийлж байсан нөхөр. Нэг үгээр, энэ хуульд ихээхэн харшилтай нэгэн. Гэвч өдгөө нийслэл дэх Захиргааны хэргийн анхан шатны шүүхийн шүүгчийн албан тушаалд горилж сууна.  Шүүхийн ерөнхий зөвлөлөөс түүнийг 2021 оны хоёрдугаар сарын 25-ны өдрийн 15 тоот тогтоолоор  томилуулах саналыг Монгол Улсын Ерөнхийлөгчид хүргүүлжээ.

Хоёрдугаарт, Ерөнхийлөгч Х.Баттулга өөрийн шадар туслах Л.Түвшинжаргалыгаа мөн шүүгчээр томилохоор болсон байна.

Тодруулбал, Шүүхийн ерөнхий зөвлөлийн 2020 оны тавдугаар сарын 20-ны өдрийн 61 дүгээр тогтоолоор Захиргааны хэргийн анхан шатны шүүхийн шүүгчийн албан тушаалд Лүндэнбазарын Түвшинжаргалыг томилуулах саналыг Монгол Улсын Ерөнхийлөгчид мөн хүргүүлжээ.

Өөрийнх нь бүрэн эрх мэдлийн энэ томилгоо мэдээж биеллээ олно. Харин хүний хувь заяатай холбоотой асуудлыг шийддэг шүүгч гэх энэ албан тушаалын нэр хүнд энэ мэт байдлаас болж улам л бүр уруудсаар. Албан тушаалыг наймаалцаж, бэлэглэж, хишиг хүртээж ирсний баттай жишээ энэ юм.

У.Тэргэл