Монгол Улсын Засгийн газар дөрөвдүгээр сарын 10-наас 25-ны хооронд хатуу хөл хорио тогтоон, энэ хугацаанд айл, өрхийн иргэн бүрд 300 мянган төгрөгийн дэмжлэг үзүүлэхээр болсон билээ. Иргэд ч нааштайгаар хүлээн авч, “Ковид”-гүй зуны төлөө хөл хорионд орохоор эгнэгт шийдсэн билээ.
Харин энэхүү шийдвэрийг гаргаад удаагүй байтал Монгол Улсын Ерөнхийлөгчийн нүүр улайм нэгэн мэдээлэл хөвөрч эхэлсэн юм. Тодруулбал, “Ерөнхийлөгчийн маань санаачилсан өрх бүрд нэг сая төгрөгийн дэмжлэг олгох хөтөлбөр явсаар иргэн бүрд 300 мянган төгрөг болж, очихоор боллоо. Иргэдийнхээ талд үргэлж зогсдог Ерөнхийлөгчдөө баярлалаа” гэх зурагт мэдээлэл сошиалаар түгсэн. Төрийн тэргүүний ойр тойрныхон ч энэхүү мэдээллийг сэвж, үнэхээр л тийм шүү гэх итгэл үнэмшлийг нийгэмд түгээхийг хичээж байна.
Оноо авах бүхнийг өөрсдөдөө нялзааж, наах гэж хичээж буй Ерөнхийлөгчийн энэ удаагийн үйлдэл арай л арга ядсан мэт санагдав. Өөрийнх нь санал болгосон нэг сая төгрөгөөс давсан шийдвэрийг харин ч Засгийн газар гаргаж, Төрийн тэргүүн ар нуруугаараа тавиулснаа мэдрэнгүүтээ сөрсөн “базаа” хийсэн нь энэ бололтой.
Тодруулбал, залуу гэр бүл гурван хүүхэдтэй. Ам бүл тавуулаа амьдардаг бол хүн бүрийн 300 мянгыг нэгтгэвэл нэг сая 500 мянган төгрөг болно. Үүн дээр гурван хүүхдийн 300 мянга гээд нийтдээ нэг сая 800 мянган төгрөг бодитоороо тухайн айлд очиж байна. Ингэснээр Ерөнхийлөгчийн амлалтыг давуулан биелүүлчихэж байгаа юм.
Монгол Улсын Ерөнхийлөгчийн сонгууль ойртох тусам нийгэмд таалагдах үг, үйлдэл бүрийг шүүрч авч,өөртөө нялзаах гэсэн энэ мэт арга ихэснэ. Харин ард түмэн үнэн зөвийг ялгаж, бурууг шүүж, асуудлыг тунгаахтайгаа гэдгийг тэд мэддэггүй, эсвэл мэдэхийг ч хүсдэггүй бололтой.
У.Тэргэл
Сэтгэгдэл (8)