Засгийн газраас цаг үеийн асуудлаар мэдээлэл хийж байна.
Улсын Онцгой комиссын дарга, Шадар сайд С.Амарсайхан “Улсын Онцгой комисс, Засгийн газар шийдвэр гарч, 15 хоногийн хатуу хөл хорионд өнөөдрөөс шилжсэн. Үүнтэй холбогдуулан цаг үеийн асуудлаар мэдээлэл өгөх гэж байна. ХӨСҮТ, ЭМЯ-наас холбогдох эрдэмтдийн зөвлөл тооцоо судалгаан дээр үндэслэн цаг үеийн эрсдэлийн үнэлгээг хийж, хатуу хөл хорио тогтоох саналаа УОК, Засгийн газраар хэд хэдэн удаа хэлэлцүүлж, шийдвэрээ өнгөрсөн дөрөв дэх өдөр гаргасан. Энэ хүрээнд халдвар хамгааллын дэглэм, вакцинжуулалттай холбоотой асуудлаар тодруулга өгөх гэж байна.
Өнгөрсөн хугацаанд аль болох хатуу хөл хорио тогтоохгүй байхаар ажиллаж байсан ч тархалт эрчимжиж, тохиолдлын тоо нэмэгдэж, эрсдэл бий болсон учраас хатуу хөл хорио тогтоосон.
Халдварын тархалтыг бууруулах, вакцинжуулалтын ажлын үр дүнг бууруулахгүй байх, хөл хорио тогтсоноос хойш дахин халдварын дэгдэлт бий болгохгүй байх тал дээр бүхий л бололцоог хангах зорилгоор хатуу хөл хорио тогтоож байгаа.
15 хоногийн хугацаанд аль болох хатуу хөл хориог үр дүнтэй өнгөрөөхийг та бүхнээс хичээнгүйлэн хүсэж байна. Хөл хорионы үед вакцинжуулалтын ажлыг давхар явуулж болохгүй гэсэн Эрүүл мэндийн яам болон салбарын мэргэжилтнүүдийн зөвлөмжийг бид дагаж байгаа.
Вакцины нөөц тасраагүй. Өнөөдрийн байдлаар 192 мянган вакцины нөөц байна. 19 аймагт халдвар бүртгэгдсэн. Улаанбаатар эрчимтэй голомт болсон. Вакцинжуулалтыг хатуу хөл хорионы үеэр давхар явуулах нь дэгдэлтийг нэмэгдүүлэх, багадаа 100-150 мянган вакцинд хамрагдах, хөл хөдөлгөөн гээд үүсэх нөхцөл байдлаас шалтгаалан хөл хорионы ач холбогдол үгүй болохоор байна. Вакцины эхний тунг авсан 864 иргэн халдвар авсан мэдээлэл байна.
Вакцинжуулалтаа дөрөвдүгээр сарын 25-ны өдрөөс дахин эрчимжүүлнэ. Вакцины хувьд өнөөдрийн байдлаар тодорхой нөөц байгаа ч гэсэн дөрөвдүгээр сарын 9-нд орж ирэх 300 мянган тун, дөрөвдүгээр сарын 12-нд ирэх 300 мянган тун вакцины татан авалт тээвэрлэлтийн хугацаа тодорхой хугацаагаар хойшилсон. Бид иргэдээсээ нууц байгаа зүйл байхгүй. Гэхдээ аль болох хурдан татан авах ажлыг зохион байгуулж байгаа" гэлээ.
Б.Баатар
Сэтгэгдэл (7)