Сүнээ нэрээр олонд танигдсан Б.Сүндэръяа өөрийн цахим хуудсаараа дамжуулан нэгэн УИХ-ын гишүүнтэй холбоотой таагүй мэдээллийг олон нийтэд цацсан. Тэрбээр өнгөрсөн амралтын өдөр нэрийг нь дурдалгүйгээр нэгэн УИХ-ын гишүүн өөрийг нь хүчирхийлэхийг завдаж байсан. Тэр ч бүү хэл одоог хүртэл дарамталж, амь насанд нь заналхийлдэг. Хэрэв ямар нэгэн байдлаар амь нас нь эрсдвэл уг гишүүнтэй холбоотой. Тэр хүнийг олон нийтэд зарлахгүй, харин өөрийн ойр дотны хүмүүстээ хэлсэн, баримт нь олдох байх гэх утга агуулгатай зүйлсийг бичиж нийтэлсэн нь олны анхаарлыг татсан. Мөн тухайн хүн нь УИХ-ын гишүүн болохын тулд ямар булхай, луйвар хийсэн талаар ч дурдсан байв.
Харин түүний энэхүү мэдээлэл нь УИХ-ын гишүүн Ц.Анандбазарыг "сандаргасан" бололтой. Тэрбээр уг мэдээлэл гарсны дараагаар цахим хуудсаараа дамжуулан нэгэн сүржин мэдэгдэл гаргасан нь олны гайхширлыг төрүүлэв.
Тодруулбал уг мэдэгдэлд "Иргэн Б.Сүндэръяа өнөөдөр буюу 2021.04.11-ний өдөр “Sunee's Ballet”, “Butenbayar Sunderya” фэйсбүүк хуудсандаа ноцтой мэдэгдэл хийсэн байна. Мэдээлэлд нэгэн УИХ-ын гишүүн хүн түүний биед халдсан, улмаар урт хугацаанд дарамтад байлгасан тухай дурдагдсан байгаа юм. Түүнд ийм бусармаг явдал үнэхээр тохиолдсон бол харамсаж байна.
Мөн уг асуудлыг хуулийн байгууллага шалгаж буруутай этгээдэд зохих хариуцлагыг хүлээлгэх ёстой гэж үзэж байна. Ийм зүй бус үйлдлийг цаг тухайд нь таслан зогсоож байх ёстой. Харамсалтай нь хэн гэдэг УИХ-ын гишүүн хүн түүнд дарамт үзүүлж байсныг нэрлээгүй учир нийгэмд УИХ-ын гишүүн Ц.Анандбазар намайг холбогдуулан нэрлэж, бичиж эхэлжээ.
Ард түмний өмнө хууль ёсыг сахин биелүүлнэ гэж тангараг өргөсөн УИХ-ын гишүүний хувьд Ц.Анандбазар миний бие “Сүнээ” гэх нэрээр нийгмийн цахим сүлжээнд танигдсан Б.Сүндэръяаг танихгүй, уулзаж байгаагүй, тухайн мэдээлэлд дурдагдсан шиг үйлдлийг огт хийгээгүй гэдгээ хариуцлагатайгаар мэдэгдье.
Б.Сүндэръяагийн нийгэмд тараасан мэдээлэл нь зөвхөн УИХ-ын гишүүн хэн нэгэн гэхээсээ илүү Монгол Улсын хууль тогтоох дээд байгууллага УИХ-ын нэр хүндтэй холбоотой асуудал яригдаж байгаа учраас уг асуудлын үнэн мөнийг хуулийн байгууллагуудаар нэн яаралтай шалгуулах нь зүйтэй гэсэн байр суурьтай байна. Иймд хуулийн байгууллагад хандаж, шалгуулах арга хэмжээг авах болно" хэмээжээ.
Харин ийнхүү яаран сандарч мэдэгдэл гаргасан нь өдгөө олны анхаарлыг татаж, түүний талаар "Гэмт хүн гэлбэлзэнэ" гэдэг боллоо. Ямар учраас ийнхүү яаран сандарч мэдэгдэл гаргав. "Сүнээгийн нэрлэсэн УИХ-ын гишүүн нь Ц.Анандбазар байсан уу" гэхчлэнгээр таамаг дэвшүүлж, хардлага төрүүлээд байна.
Ямартай ч эрхэм гишүүн Сүнээгийн мэдэгдэлд цочир хандсаны шалтгаан удахгүй ил болох биз.
Б.Баатар
Сэтгэгдэл (30)