Коронавирусний цар тахалтай холбоотойгоор Улаанбаатар хотод хатуу хөл хорио тогтоогоод буй. Энэ хугацаанд вакцинжуулалтыг эрчимжүүлнэ хэмээн Засгийн газрын тэргүүн Л.Оюун-Эрдэнэ мэдэгдэж байсан ч энэхүү шийдвэр алга эргүүлэхийн зуурт өөрчлөгдөж, хөл хорионы үеэр вакцинжуулалтыг хийхгүй болсныг Улсын Онцгой комиссоос мэдэгдсэн. Энэ талаар Шадар сайд С.Амарсайхан "Эрүүл мэндийн яам, эрдэмтдийн зөвлөлийн зөвлөснөөр хөл хорионы үеэр коронавирусний дархлаажуулалтыг хийхийг зогсоосон. Учир нь, хөл хорионы дэглэм алдагдах магадлалтай тул ийнхүү шийдвэр гаргасан. Вакцины нөөц тодорхой хэмжээнд байгаа" гэдгийг мэдэгдсэн юм.

Дархлаажуулалтыг зогсоосон нь вакцины нийлүүлэлттэй холбоотой байхыг үгүйсгэхгүй гэдгийг зарим эх сурвалж мэдээлж буй. Үүнийг ч Эрүүл мэндийн сайд гэмгүй мэдээлчихсэн.  Тэрбээр "Энэ сарын 9, 12-ны өдөр орж ирэх байсан вакцины тээвэрлэлт, нийлүүлэлт хойшилсон. Гэхдээ 7-13 хоногийн дотор оруулж ирнэ" гэдгийг хэлсэн юм. 

Харин сайдын мэдээлж буй нийлүүлэлт хойшилсон вакцин нь БНХАУ-ын Синофарм үйлдвэрийн Verocell вакцин аж. Харин ямар шалтгаанаар ийнхүү хойшилсон нь одоогоор тодорхойгүй байгаа юм. 

Уг нь БНХАУ-ын Засгийн газар манай улсын бэлэглэсэн 300 мянган хонины хариу болгож, 300 мянган тун вакциныг монголчуудад хандивлаж байсан цаг саяхан. Тухайн үед БНХАУ-аас Монгол Улсад суугаа Элчин сайд Чай Вэньруй "БНХАУ-ын Засгийн газраас бэлэглэсэн вакциныг хүлээлгэн өгч буйдаа баяртай байна. Цар тахал гарснаас хойш манай хоёр улс үргэлж бие биедээ тусалж, дэмжиж иржээ. Энэ хүнд хэцүү цаг үед бие биеэ ойлгож, Монгол Улс 30 мянган хонь бэлэглэсэн. Үүнд бид маш их баярлаж байдаг. Тиймээс ч өнөөдөр энэхүү вакциныг гардуулан өгч байна. Хэдийгээр вакцины хүрэлцээ хангалттай биш байгаа ч БНХАУ-ын тал Монгол Улсад вакцин хандивлаж байгаа нь бидний найрсаг харилцааны илэрхийлэл юм. Цаашид хоёр улсын стратегийн харилцааг илүү өргөжүүлж, харилцан ашигтай хамтын ажиллагааг өндөр түвшинд гаргахын төлөө хамтран ажиллахад хэзээд бэлэн байх болно" гэдгээ илэрхийлж байсан.

Харин тэгвэл энэ удаад ямар учраас вакцины нийлүүлэлт саатаж, монголчууд дархлаажуулалтаа түр зогсоох болов гэдэг нь олны анхаарлыг татаж, сэтгэлийг чилээгээд байна. 

Б.Баатар