Ардчилсан нам өнөөдөр тэхий голоороо хуваагдаж, дарга, цэрэг, тамга нь хүртэл хоёр болчихлоо. Энэ янзаараа Ерөнхийлөгчийн сонгуульд намаасаа хүн нэр дэвшүүлэх нь бүү хэл, шүүх аль талыг нь жинхэнэ нам болохыг тогтоож, бүртгэхэд ярвигтай байдалд орсон. Харин энэ намын үйл ажиллагаагаа хэвийн явуулж байгаа, албан ёсны ганц субьект бол УИХ дахь Ардчилсан намын бүлэг нь. Гэтэл бүтэн байгаа Бүлгээ дотроосоо хэмлэх нь их болов.
2020 оны сонгуулийн үр дүнд бүлэг байгуулах хэмжээний суудал авсан гишүүдээ хоёр тийш чангааж, сайн муугаар чичлэх болов. Мэдээж тэдний зодоон эрх баригчдад сайхан далим болж сөргөлдөөнд нь гал нэмж, дүрэлзүүлж байгаа нь ойлгомжтой. Нэмээд төрийн тэргүүн, Ерөнхийлөгч Х.Баттулга өөрийнхөө төлөө үйлчлүүлэхийн тулд бүлгийг хагалж, даргыг нь солих тухай “бор шувуу” нисгэж эхэллээ. Цөөнхийн бүлэгт завсарлага авах, дүгнэлт танилцуулах, УИХ-ын хяналт шалгалтын чиг үүрэг гүйцэтгэх, ажлын хэсэг байгуулах гэх мэт цөөнгүй боломж бий. Хэрэв бүлэггүй болох аваас 11 сул гишүүн л үлдэнэ. Тэдэнд микрофоноос өөрөөр эрх баригчидтай тэмцэх зэвсэг үлдэхгүй л болов уу. Өмнөх парламентын үед АН-ын бүлэг яаж хөгөө чирж зөвлөл нэртэй хэдэн сул гишүүн бүрэн эрхийн хугацаагаа өндөрлүүллээ дээ. Загасны ой санамжтай биш аваас ийм гашуун түүхээ давтахаас болгоомжилж л баймаарсан. Ер нь бутарч хуваагдаж, өвөр хоорондоо тэмцэлдэж байхдаа улс, овог аймаг хүчтэй, хүчирхэг байсан түүх бий билүү. Хүчээ барж, доройтож биесээ татаж унагасан нь олон байх.
Ардчиллын төлөөх намууд нэгдэж одоогийн АН-ыг байгуулсан. Тиймдээ ч ардчиллын үнэт зүйлийг иргэд АН-аас нэхдэг, бас шаарддаг. Энэ ч зүй ёсны нэхэл. Гэвч нэг үхрийн эвэр доргивол мянган үхрийн эвэр доргидгийн биелэл болж Бүлгээ бутаргаваас хожил хэний талд очихыг эрхбиш ойлгодог л гэж найдъя. Уг нь нам ялагдсан, сул дорой байгаа энэ үедээ харин ч Их Хурал дахь бүлгээ хуульд заасан боломж, нөхцөлөөр улс төрийн үйл ажиллагаагаа явуулахад нь дэмжих учиртай байлтай. Гэвч өргөж босгохоос, татаж унагах нь түүнд амар байгаа бололтой.
С.Сүлд
Сэтгэгдэл (1)