Одоогийн Ерөнхийлөгч Х.Баттулга энэ жилийн ээлжит сонгуульд дахин нэр дэвших үү. Үндсэн хуулийн цэц энэ сарын 16-ны баасан гаригт дунд суудлаараа хуралдаж хэрхэхийг шийднэ.
Үндсэн хуулийн цэцээс гарах шийдвэрт Ерөнхийлөгч Х.Баттулга найдахгүй байгаа бололтой. Учир нь түүний “баг”-ийнхан энэ хатуу хөл хорион дундуур хөдөлгөөнд орж эхэлсэн байна. Үндсэн хуулийн цэцийн хуралд зориулсан эсэргүүцлийн жагсаал цуглаан болж магадгүй гэх мэдээлэл ч бидэнд ирэв. Жагсаал, цуглааны арга хэмжээ нь 2021 оны 4 дүгээр сарын 15, 16-ны өдрүүдэд болох бололтой.
Өнөөдөр /2021-4-13/ МоАХ-ны байранд холбооныхоо гишүүдийн хурлыг дүүрэг дүүргээр нь цаг зоогоод байв. 14:00 цагт Хан-Уул дүүргийн МоАХ, 16:00 цагт Сонгинохайрхан дүүргийн МоАХ, 18:00 цагт Чингэлтэй дүүргийн МоАХ-ынхан хуралдахаар төлөвлөөд байв. Харин энэ төлөвлөгөө нь ялимгүй өөрчлөгдөж, өнөөдөр АН-ын ХЭГ-ын дарга асан П.Нүрзэд, Нийслэлийн АН-ын дарга нар “Бодь тауэр”-ын аравдугаар давхарт Сонгинохайрхан, Баянзүрх, Хан-уул, Баянгол, Чингэлтэй, Сүхбаатар дүүргийн МоАХ-ноос тус бүр арван хүнийг ээлжлэн дуудаж, уулзалт хийсэн байна.
Маргааш ЕТГ-ын дарга Ө.Шижир, ЕТГ-ын дэд дарга Г.Байгалмаа, АН-ын ХЭГ-ын дарга асан П.Нүрзэд, АН-ын дарга О.Цогтгэрэл нар Төв шуудангийн урд байрладаг Нийслэлийн АН-ын гэх байранд уулзалт хийж, Ерөнхийлөгчийн сонгуулийн штаб байгуулах асуудлаар хуралдах гэнэ. Тэд Ерөнхийлөгчийн сонгуулийн штабаа “Бодь тауэр”-ын аравдугаар давхрыг байрлуулахаар тохижуулж буй аж.
Ийн хатуу хөл хорионы үеэр олныг хамарсан жагсаал зохион байгуулж болзошгүй болжээ. Мэдээж, үүний зорилго нь Х.Баттулгыг Ерөнхийлөгчид дахин нэр дэвшүүлэхгүй бол эсэргүүцнэ.
Гэхдээ жагсаалд оролцох “урилга” авсан нөхдүүд нь өөр өөр байр суурьтай байна. Тэдний зарим нь “Шагнал гардуулж байхад нь талбай дээр хүн өөрийгөө шатаасан, Түвшинбаяр нь хүн зодсон. Ер нь ингээд цаанаасаа болохгүй байхад шахаад дайраад байх юм. Асуудал үүсвэл бид л буруутна” гэцгээж байгаа нь дуулдаж л байна.
Үндсэн хуулийн цэцийн хурал угтсан иймэрхүү үйл явдал өнөөдөр болжээ. Энэ талаар учир мэдэх хүмүүс “Х.Баттулга хэтэрхий “шатаад” байна” гэж байна.
Сэтгэгдэл (18)