Ерөнхий сайд Л.Оюун-Эрдэнэ Монголын Үндэсний олимпийн хорооны Ерөнхийлөгч Н.Түвшинбаяраас нүүр буруулж, нэрээ цэвэрлэж авсан талаар бид өмнө нь мэдээлж байсан. Тодруулбал, Н.Түвшинбаярыг орон тооны бус зөвлөхөөр томилсон тухай албан ёсны цахим хуудсаараа дамжуулан мэдээлж байсан ч хэрэгт холбогдсоны дараах нь түүнийг уг албанд томилох шийдвэрийг албажуулаагүй байсан гэх тайлбарыг өгсөн. Тэгвэл энэ удаад УИХ дахь Ардчилсан намын бүлгийн дарга Д.Ганбат дээрх "школ"-ыг ашиглаж, хүчингийн хэрэгт холбогдож байсан хэмээн цахим сүлжээнд "баалуулж" буй П.Энхмөнхөөс мөн л нэрээ цэвэрлэхээр шийджээ.
Тодруулбал, манлай уяач П.Энхмөнх хүчингийн хэрэгт холбогдож, хуулийн байгууллагад шалгагдаж байсан гэх мэдээлэл сүүлийн өдрүүдэд хуурай өвсөнд гал тавьсан мэт дүрэлцэн түгэж байна. Загвар өмсөгч бүсгүйг хүчиндсэн хэргээр дахин шалгагдаж буй гэх П.Энхмөнх УИХ дахь Ардчилсан намын бүлгийн зөвлөхөөр ажиллаж байсан билээ. Түүнийг Ардчилсан намын бүлгийн дарга Д.Ганбат томилж, үнэмлэхийг нь гардуулж өгч байсан цаг саяхан. Тухайн үед энэ нь шүүмжлэл дагуулж байсан ч тэгэсхийгээд намжсан. П.Энхмөнхтэй холбоотой хэргийн баримт дахин ил болсноор уг асуудал олны анхаарлын төвд орсон. Тиймээс ч Ардчилсан намын бүлэг П.Энхмөнхөөс нүүр буруулж, бүлгийн нэрээ цэвэрлэхээр мэдэгдэл гаргажээ. Уг мэдэгдэлд П.Энхмөнхийн бүлгийн зөвлөхөөр ажиллах хугацаа дууссаныг тодотгоод түүнийг тайлбар хийхийг анхааруулсан байна.
Энэ нь Ерөнхий сайд Л.Оюун-Эрдэнэ зодооны хэрэгт холбогдож, хоригдож буй МҮОХ-ны ерөнхийлөгч Н.Түвшинбаяраас нүүр буруулсантай ижил үйл явдал болов. Ямартай ч улстөрчид алдаа гаргасан нэгнийг "ашиглаад" хаядаг жишгийг ийнхүү тогтоов бололтой.
Б.Баатар
Сэтгэгдэл (5)