Дэлхий нийтийг хамарсан цар тахлын халдвар Монголд эрчимжиж байгаатай холбогдуулан Улсын онцгой комиссын үйл ажиллагаанд иргэд олон нийтийн зүгээс ихээр бухимдах болсон.

Учир нь, Шадар сайд С.Амарсайхан зөвхөн удирдах арга барилын хувьд төдийгүй хувь хүнийхээ хандлага, хариуцлага хүлээх чадвар талаасаа УОК-ийг удирдах чадваргүй гэдгээ удаа дараа баталсан. Энэ удаагийн 15 хоногийн хөл хорионы эмх замбараагүй зохион байгуулалт ч яах аргагүй түүний нэр дээр бичигдэх алдаа дутагдал бөгөөд  буруутай шийдвэрийнх нь улмаас өнгөрсөн хоёр өдрийн дотор нийслэлийн иргэд төөрөгдөлд орж, гудамжаар алхаж болох болохгүйгээ ч мэдэхгүй эргэлзээнд орох нь тэр. Үүгээр ч зогсохгүй тэрбээр төрийн албан хаагчдыг мөрдөж мөшгих, ажил төрлөө хийх боломж нөхцлийг нь хаах эрх үүрэг даалгаврыг нийгмийн дэг журмыг хангахын тулд ажиллаж байгаа цагдаа, хүчний албан хаагчдад өгсөн байх юм.

Өөрөөр хэлбэл, төрийн албан хаагчдыг өглөөний 8:30 цагаас хойш хөдөлгөөнд оролцуулахгүй байх, оролцсон тохиолдолд хатуу арга хэмжээ авч, хариуцлага тооцохыг үүрэгдсэн бол оройн 17.30 цагаас хойш зөвхөн ажил гэр гэсэн маршрутаар хөдөлгөөнд оролцох ёстой хэмээн үүрэгджээ. Хэдийгээр Засгийн газраас зарласан хөл хорионы үед төрийн албан хаагчдын 10 хувь нь ажиллаж байгаа ч тэдний хувьд албан үүргээр байгууллага хооронд очих, бичиг баримт хүргэх, биечлэн уулзах зэрэг цөөнгүй шалтгаан байхыг үгүйсгэх аргагүй. Гэтэл эдгээр үүргийн дагуу хөдөлгөөнд оролцохыг нь хориглож, хариуцлага тооцохыг үүрэг болгосон нь Монгол Улсын 200 мянга гаруй төрийн албан хаагчдын эгдүүцлийг төрүүлээд байгаа юм.

Түүнчлэн, эцэс сүүлдээ өөрийн дааж давахгүй болсон үүрэг даалгавраа Нийслэлийн онцгой комисс руу эргүүлж, буруутныг нийслэлийн байрнаас тодруулахыг албан бусаар үүрэгдсэн гэх яриа ч төрийн ордонд тархаад байна. Өөрөөр хэлбэл, цэвэр өөрийнх нь удирдлагын дор ажиллах ёстой Эрүүл мэндийн яам, Халдвар судлалын үндэсний төв ачааллаа даахгүй, халдварт өвчний тусламж үйлчилгээг үзүүлэх тэнхээгүй болохтой зэрэгцэн “Нийслэлийг үүрэг хүлээ” хэмээн захиргаадаж буй нь ийнхүү Шадар сайдын ажил үүрэх тэнхээ дууссаныг илэрхийлэх биз ээ. Тиймээс Засгийн газар нэн яаралтай Улсын онцгой комисс, тэр дундаа Шадар сайд С.Амарсайханы үүрэг хүлээх чадварт бодит үнэлэлт дүгнэлт өгч асуудлыг шийдвэрлэхгүй бол иргэд олон нийтийн зүгээс ч төрд итгэх итгэл улам бүр алсрах эрсдэл үүсэв бололтой.

Б.Жаргал