Цахим сүлжээгээр охид, эмэгтэйчүүдийн хүчирхийллийн эсрэг "MeToo" хөдөлгөөн өрнөж байна. Үүнтэй холбогдуулан УИХ-ын гишүүд байр сууриа илэрхийллээ.

УИХ-ын гишүүн Ж.Сүхбаатар "Хууль зүйн тодорхой хэрэг, маргааны талаар УИХ-ын гишүүн байр сууриа илэрхийлэхдээ туйлын хянамгай байх ёстой. Учир нь, холбогдох хуулиудад УИХ-ын гишүүн-төрийн өндөр албан тушаалтан хэрэг, маргааныг хянан шийдвэрлэх ажиллагаанд хөндлөнгөөс оролцох, нөлөөлөх, саад учруулахыг хориглодог!

Бэлгийн дарамт, гэр бүлийн хүчирхийллийн талаарх миний байр суурь:

1. Хүний эрх, эрх чөлөөг зөрчих, зөрчиж байгаа үйлдлийг өөхшүүлэхгүй, эсэргүүцнэ. 

2. Хүний эрхийн хамгаалалт талаас хууль тогтоох ажилдаа байнга ханддаг. УИХ-ын гишүүн буюу ард түмний төлөөлөгчөөр сонгогдоод 9 сар орчим болохдоо иргэдийн эрхийг хамгаалахад онцгой ач холбогдолтой Шүүхийн болон Хүний эрх хамгаалагчийн эрх зүйн байдлын тухай хуулийн төслүүдийн ажлын хэсэгт орж ажиллан уг хуулийн төслүүдийг батлуулан одоо амьдралд хэрэгжүүлэх ажилд нь анхаарч байна.

3. Иргэн Б.Сүндэрьяагийн өчигдөр албан ёсоор цагдаагийн байгууллагад хандсан гомдлын тухайд, хууль сахиулах байгууллага УИХ-ын гишүүн гэмт хэрэг үйлдсэн эсэхтэй холбоотой энэ хэрэг явдлыг элдэв нөлөөнд авталгүй хуулийн дагуу шийдвэрлэх ёстой гэж үзэж байна. Холбогдогч талуудын хэн хэн нь олон нийтэд хандан мэдэгдэл гаргасан. Иргэдийн дунд түүнийг тойрсон хэлэлцүүлэг шүүмж өрнөж байна.
Олон нийт бэлгийн дарамт, хүчирхийллийн эсрэг төрөөс дорвитой арга хэмжээ авахыг шахаж шаардаж буй нь зүй ёсны, Үндсэн хуулийн эрхээ хамгаалуулах эсэргүүцэл. 

Ажлын байран дахь бэлгийн дарамтыг гэмт хэрэгт тооцон хүлээлгэх хариуцлагыг зайлшгүй бөгөөд бодитой болгоход миний бие УИХ дахь Эмэгтэйчүүдийн бүлэг болон Хүчирхийллийн эсрэг лобби бүлгийн гишүүдтэйгээ идэвхтэй хамтран ажиллаж УИХ-ын хаврын ээлжит чуулганаар батлуулахын төлөө зүтгэнээ. 

УИХ-ын гишүүний ёс зүй, хариуцлагын тухайд УИХ-ын Ёс зүй, сахилга хариуцлагын байнгын хороо цаашид анхаарлаа хандуулах ёстой!" гэжээ.