Коронавирусний цар тахалтай холбоотойгоор нийслэлд төдийгүй халдварын голомт болсон аймгууд "Улаан" түвшинд шилжээд буй. Үүний нэг нь Дорноговь аймаг.

Тус аймгийн Засаг дарга Улсын Онцгой комиссын 2021 оны дөрөвдүгээр сарын 8-ны өдрийн 02 дугаар тогтоолыг үндэслэн аймгийн Засаг даргын “Гамшгаас хамгаалах бүх нийтийн бэлэн байдлын зэрэгт шилжүүлсэн Засгийн  газрын шийдвэрийн биелэлтийг хангах тухай” А/206 дугаартай захирамж гаргасан байна.

Тус захирамжид, "Халдварын тархалтын “Улаан түвшин”-д  2021 оны дөрөвдүгээр сарын 10-ны өдрийн 06:00 цагаас  2021 оны  дөрөвдүгээр сарын  25-ны өдрийн 00:00 цаг хүртэл шилжүүлэх"-ийг үүрэгджээ. Энэ хугацаанд, хуулийн этгээдийн хязгаарлахгүй чиглэлээс бусад үйл ажиллагааг хязгаарлаж, зөвшөөрснөөс бусад тохиолдолд сум хооронд зорчих иргэн, тээврийн хэрэгслийн  хөдөлгөөний хязгаарлалт хэвээр үргэлжилнэ. Зөвшөөрснөөс бусад тохиолдолд  зорчихгүй  байхыг нийт иргэнд үүрэг болгожээ. Мөн хүн хоорондын зай барих, нэг дор 5-аас илүү хүн цуглахгүй байхаар шийдвэрлэсэн байна. 

Иргэд ч эл шийдвэрийг хүлээн зөвшөөрч, халдвар хамгааллын дэглэмээ баримталж байгаа аж. Харин тус аймгаас сонгогдсон УИХ-ын гишүүд Дорноговь аймагт эрх дураараа "аашилж" эхэлжээ. 

Тодотговол, УИХ-ын гишүүн Б.Дэлгэрсайхан, Т.Энхтүвшин нар хатуу хөл хорионы үеэр буюу сүүлийн хоёр хоногт Дорноговь аймагт айлчилж, төрийн албан хаагчдыг бөөгнөрүүлж, хурал цуглаан хийж, МАН-ын 100 жилийн ойн медаль гардуулж, бэлэг сэлт тарааж явна.  Үүгээр ч зогсохгүй тус хуралдаандаа орон нутгийн Засаг дарга, ИТХ-ын дарга нарыг залж, оролцуулжээ. Уг нь тус аймаг "Улаан" түвшинд шилжиж, хөл хөдөлгөөнийг хориод буй.  

Дорноговь, Өмнөговь аймгийн хилийн онцгой бүс гэж үзээд улс анхааралдаа авсан.

Ингэхдээ дээрх аймгууд руу нэвтрэх зөвшөөрлийг аймаг орон нутгаас бус УОК-ын Шуурхай штаб олгож байх зохицуулалт хийсэн. Энэ талаар ч Шуурхай штабаас удаа дараа мэдээлж байсан билээ. Гэтэл өнөөх онцгой бүсэд нь эрхэм гишүүд халдвар хамгааллын дэглэм зөрчиж, эрх тааваараа аашилж  байх.  

Улаанбаатар хот ч хатуу хөл хорио тогтоож, хөдөлгөөнийг хязгаарлаад буй. Ингэхдээ хүнс тээвэр, буяны ажил гэх мэт зайлшгүй шалтгаанаар хотоос гарах хөдөлгөөнийг зөвшөөрсөн. Тэгвэл эрхэм гишүүд ямар дүрэм журмаар, хэрхэн нэвтэрсэн нь олны анхаарлыг эрхгүй татаж байна. Ер нь сүүлийн үед жирийн иргэд халдвар хамгааллын дэглэмээ баримталж, төр, засгаас гаргасан шийдвэрийг даган мөрдөж байгаа бол эрх мэдэл, албан тушаалтнууд нь эрх дураараа сэлгүүцдэг болсны тод жишээ энэ биз. 

Хэрэв дээрх үйл ажиллагаанаас шалтгаалж, Дорноговь аймагт халдвар хамгааллын дэглэм алдагдаж, аймаг тэр чигтээ халдварын голомт болбол хэн хариуцлага хүлээх вэ. Улаанбаатар хотоос ирсэн иргэдийг 14 хоног тусгаарлана гэсэн дэглэм хэвээрээ юу, 5- аас дээш хүн бөөгнөрөхийг хориглоно гэх шийдвэр УИХ-ын гишүүдэд яагаад нөлөөлсөнгүй вэ, сумдын Засаг дарга, хурлын дарга нар сум орон нутагтаа халдвар тархаавал хэн хариуцлага хүлээх вэ гэхчилэн олон асуулт хариултаа нэхэж байна.

Коронавирусний халдварын улмаас 30 хүн амь насаа алдсан харамсалтай мэдээтэй бид нүүр тулаад буй. Тэгвэл дээрх үйл ажиллагаанаас шалтгаалж эрдэнэт хүний амь нас эрсдвэл хариуцлагыг нь Б.Дэлгэрсайхан, Т.Энхтүвшин нар хүлээх үү. 

Хилийн онцгой бүс болсон Дорноговь аймаг тэр чигтээ халдварын голомт болбол урд хөрш хэрхэн хүлээж авах бол. Тэд эрсдэлийг дэндүү ихээр мэдэж байгаа учраас л өнөөдөр хилээр нэвтрэх автомашины тоо хязгаартай байгаа. Нөхцөл байдал ийм атал эрхэм гишүүд тойргоо "усалж", өөрсдийн байр суурийг бэхжүүлж явах гэж. 

"Улаан" түвшинд шилжсэн, улсын онцгой бүсэд эрх дураараа аашилж буй УИХ-ын гишүүн Б.Дэлгэрсайхан, Т.Энхтүвшин нарын дээрх үйлдлийг Улсын Онцгой комисс, Засгийн газар, УИХ нь анхааралдаа авахад илүүдэхгүй биз. 

Б.Баатар