Үндсэн хуулийн Цэцийн дээр хөх тэнгэр байдаг гэдэг. Цэцийнхэн ч үүгээрээ түрий барьж, харин өдгөө бүр хуулийн дээгүүр гишгэлж эхэллээ. Учир нь, Үндсэн хуулийн Цэц Ерөнхийлөгч Х.Баттулга дахин нэр дэвших эрхтэй эсэхийг бага суудлын хуралдаанаараа хэлэлцсэн, хэлэлцээгүй хэмээн маргалдан байж дунд суудлын хуралдаанаа зарласан. Гэвч ихээхэн хүлээлт үүсгээд байсан тус хуралдаан өнөөдөр болох байсан ч хойшиллоо.
Цэцийн дунд суудлын хуралдаантай холбоотойгоор Ерөнхийлөгч Х.Баттулгыг Үндсэн хуулийн Цэцэд нөлөөлж, өөрийн талд шийдвэр гаргуулах зорилгоор П.Нүрзэд, МоАХ-ын С.Эрдэнэцогт нараар дамжуулан Үндсэн хуулийн Цэцийн гадна өчигдөр жагсаал цуглаан зохион байгуулсан.
Хатуу хөл хорионы дэглэмийг зөрчин, эрүүл мэндээ эрсдэлд оруулан байж жагсаж, цуглаж байсан хүмүүс харин өнөөдөр Цэцийн дунд суудлын хуралдаан хойшлохыг мэдсэн юм шиг ор сураггүй болсон нь эрхгүй анхаарал татаж байна. Үүнээс Ерөнхийлөгч Х.Баттулга Цэцэд нөлөөлөх оролдлогоо үргэлжлүүлж, жагсаал цуглааныг зохион байгуулалттайгаар хийсэн нь илт байна.
Мөн Үндсэн хуулийн Цэцийн дунд суудлын хуралдаан хойшлох болсон шалтгаан нь Ц.Нанзаддорж гишүүн хуралд оролцохоос татгалзсан гэх. Цэцэд маргаан үүсгэсэн хүмүүс нь энэ тухай мэдээгүй байхад нэр бүхий хэвлэл мэдээллийн хэрэгслээр аль хэдийнэ Цэцийн шийдвэрийг мэдээлэв.
Мөн Ерөнхийлөгчийн итгэмжлэгдсэн төлөөлөгч хуульч Б.Гүнбилэг Цэцийн байрны гадаа очиж, хэвлэл мэдээллийнхэнд ярилцлага өгөв. Болж буй бүх үйл явдал Цэцийн дунд суудлын хуралдаанд Х.Баттулга Ерөнхийлөгч нөлөөлж, энэ талаарх мэдээллийг урьдчилан хэвлэл, мэдээллээр тараасан байж болох талтай.
Тавилттай энэ мэт жүжиг, зохион байгуулалттай жагсаал цуглаан Цэцийн эцсийн шийдвэр гарах хүртэл үргэлжлэх нь тодорхой. Харин Үндсэн хуулийн энэ мэт хууль бус үйлдлийг үл огоорон, хуулийн дагуу хуралдан шийдвэрээ гаргахыг хүлээх л үлдлээ.
У.Тэргэл
Сэтгэгдэл (4)