Монгол Улсын Үндсэн хуулийн цэц Дунд суудлын хуралдаанаар Монгол Улсын Ерөнхийлөгчийн сонгуулийн тухай хуулийн зарим зүйл, заалт Үндсэн хуульд нийцэж байгаа эсэхийг хянан хэлэлцсэн. Тус хуралдаанаар Монгол Улсын Ерөнхийлөгч Х.Баттулгыг дахин нэр дэвших эрхгүй гэж үзсэн талаар бид мэдээлсэн. 

Тэгвэл эл асуудлаар ҮХЦ-д гомдол гаргасан УИХ-ын гишүүн Т.Доржханд байр сууриа илэрхийллээ. Тэрбээр "Өнөөдөр түүхэнд тэмдэглэхүйц онцгой үйл явдал боллоо. Үндсэн хуулийн цэцийн шийдвэр нь засаглалыг хэрхэн хуваах, цаашид Монгол Улсад ардчиллыг цааш нь авч явах үнэт зүйл мөн үү. Үүнд хуулийн засаглал байх уу хувь хүний засаглах уу гэдэгт хариулт өгсөн үйл явдал боллоо. Нөгөө талдаа олон улсын хуулийн байгууллагууд энэ үйл явдлыг тэмдэглэх байх гэж хуульчид үзэж байна. 

Өнөөдөр өглөө цэцийн дунд суудлын хурал зарласан ч түр хойшилсон. Бид Цэцийн дунд суудлын хуралдаанаа яаралтай хийхийг шаардсан. Тиймээс ч Цэц шинэ бүрэлдэхүүнээр хуралдаж, асуудлыг хэлэлцлээ. Хуралдаанд хуульч Д.Үүрцайх, О.Мөнхсайхан болон н.Бат гэж хүний хуулийн зөвлөх, Н.Энхболд гишүүн нар оролцож, хуралдаан халуухан, мэргэжлийн боллоо.

Цэц УИХ үндсэн хуулийг зөрчиж, тусгах ёстой заалтыг тусгаагүй байна. Тиймээс хуульд холбогдох заалтыг тусгах нь зүйтэй гэсэн шийдвэрийг гаргалаа. УИХ 15 хоногийн дотор цэцийн шийдвэрийг хэлэлцэх ёстой. Энэ нь нийгэмд үүсээд байсан бухимдал эргэлзээг тайлж өглөө. Үндсэн хуулийн цэц өмнө нь эрх мэдэлтэй албан тушаалтнуудын талд шийдвэр гаргадаг байсан бол өнөөдөр иргэдийнхээ талд шийдвэр гаргаж чадлаа" гэв. 

Б.Баатар