Коронавируст халдварын тохиолдол сүүлийн өдрүүдэд эрчимтэй нэмэгдэж, улсын хэмжээнд нийт батлагдсан тохиолдол 21,995 болж, эмчлүүлж буй иргэний тоо 11,807 болов. Үүгээр ч зогсохгүй уг халдварын улмаас амь насаа алдсан иргэдийн тоо 50 хүрэх нь. Нөхцөл байдал хэдийнэ хүндэрч, эмч эмнэлгийн ажилчид хүрэлцэхээ байв.

Тиймээс ч коронавирусний цар тахалтай тэмцэх эмнэлгийн тусламж үйлчилгээнд сайн дураар дайчлагдан ажиллах хүсэлтэй эмч, эмнэлгийн мэргэжилтнүүдийг өнөөдрөөс эхлэн Эрүүл мэндийн хөгжлийн төв дээр бүртгэж эхэллээ. 

Улаанбаатар Ухань болох нь. Коронавирусний цар тахал дэгдэж байх үед дэлхий нийтээрээ халаглан уулгалж байсан цаг саяхан. Тэр ч бүү хэл манай улсын эмч нар халдварын голомт болсон БНХАУ-ын Ухань хотод очиж ажиллах санал санаачлага гаргаж, олныг гайхшруулж байсан билээ.

Тодотговол, Эрүүл мэндийн дэд сайд асан Ж.Амарсанаа “Би 2020 сарын хоёрдугаар сарын 2-нд шинэ коронавирусний голомт (2019-nCoV) БНХАУ-ын Ухань хот руу сайн дурын эмчээр явахаар боллоо. Коронавирусний голомтод хамтдаа баг болоод сайн дурын эмчээр ажиллах, залуу, эрүүл чийрэг эмч нар байвал яаралтай холбоо барина уу. Баг болоод хамтдаа явцгаая” хэмээн цахим сүлжээгээр олон нийтийг уриалж байв. Гэхдээ тэд яваагүй.   

Тэгвэл одоо эх орон тань хүнд байдалд орж, сайн дураараа ажиллах эмч эмнэлгийн ажилчдыг "гуйж" эхэллээ. Эх орон та бүхнийг дуудаж байна.

Халдварын голомт болсон "Уханьд очиж ажиллая" гэж уухайлан дуудаж байсан Ж.Амарсанаа та тангараг өргөсөн эмч хүний хувьд одоо л бусдыгаа уриалан дуудаж, коронавирусний цар тахалтай нүүр тулан тулалдах хэрэгтэй байна. Энд шоу, улс төр бус эрдэнэт хүний алтан амь яригдаж байгаа учир олон нийт ч анхааран харж, хүлээж буй биз ээ.  

Б.Баатар