УИХ-ын чуулган дээр Ц.Мөнх-Оргил гишүүн нэгэн ноцтой баримт дэлгэсэн нь АН АНУ-ын лобби буюу нөлөөллийн компаниудаадтай гэрээ байгуулсан тухай юм. УИХ-ын гишүүн Д.Туваан үгүйсгэсэн ч энэ нь үнэн болох баримтууд хэдийнэ ил боллоо.

АНУ-ын лобби компаниуд гадаад, дотоодын үйл ажиллагаа явуулах гэрээ байгуулах бүртээ бүртгүүлдэг бүртгэлийн сангийн мэдээллээр энэ нь баталгаажиж байгааа юм.

Энэ бүртгэлд дурдсанаар АНУ-ын DCI гэдэг лобби групптэй АН-ын дарга Д.Туваан гарын үсэг зуран гэрээ байгуулсан байна. 50 мянган долларын үнийн дүнтэй энэхүү гэрээг дөрөвдүгээр сарын 12-ноос зургадугаар сарын 12 хүртэл хоёр сарын хугацаатай байгуулсан байна.  Энэ нь Ерөнхийлөгчийн сонгуулийн хугацаатай давхцаж байгаа гэсэн үг.

Уг нь Ерөнхийлөгчийн сонгуулийн тухай хуульд “Гадаад улс буюу гадаадын байгууллага, гадаадын хөрөнгө оруулалттай байгууллага, төрийн болон нутгийн өөрөө удирдах байгууллагаас хандив, дэмжлэг, туслалцаа авахыг хориглоно” гэсэн заалт байдаг. Хуулийн энэ заалтыг зөрчвөл тухайн намаас нэр дэвшигчийг эгүүлэн татах хүртэл арга хэмжээ авдаг билээ.

Өнгөрсөн сонгуулийн үеэр МАХН-аас нэр дэвшигч С.Ганбаатар нь Солонгосын иргэдээс 50 сая вон авч байгаа нь бичлэгээр нотлогдсон. Гэсэн ч нэр дэвшигч мэдүүлэг өгөхгүй, хуулийн байгууллагын дуудсан цагт очихгүй байсаар сонгуулийн санал хураалтад оролцсон билээ.

Ингэж МАХН-аас нэр дэвшигч С.Ганбаатар Ерөнхийлөгчийн сонгуулийн тухай хуулийг маш ноцтой зөрчсөн ч ял шийтгэл хүлээлгүй өнгөрсөн юм. Хэрэв хуулийг ягштал мөрддөг, хэрэгжүүлдэг, хяналт тавьдаг бол нэр дэвшигч С.Ганбаатар өдгөө УИХ-ын гишүүн болох нь бүү хэл нэр дэвших ч эрхгүй байх байлаа.

Түүний хууль зөрчсөн үйлдлийг ял шийтгэлгүй өнгөрүүлсөн нь өдгөө АН-ын эрх бүхий хүмүүсийг дахин гаднынхнаас санхүүжилт авахад айдасгүй болгосон бололтой. Уг нь Д.Тувааны эл үйлдэл нь ирэх Ерөнхийлөгчийн сонгуульд АН-ыг оролцуулахгүй байх боломжийг ч бүрдүүлж байгаа юм.

С.Сүлд