Н.Ганибал:Эрх баригчид Цэцэд нөлөөлж байна

Н.Ганибал: Эрх баригчид Цэцэд нөлөөлж байна

2021-4-22

УИХ-ын өнөөдөр /2021.04.22/-ийн нэгдсэн чуулганаар Монгол Улсын Үндсэн хуулийн цэцийн 2021 оны хоёрдугаар дүгнэлтийг хэлэлцлээ.

Энэ үеэр УИХ-ын гишүүн Н.Ганибал эрх баригчид ҮХЦ-ийн шийдвэрт нөлөөлж, Үндсэн хуулийн хямрал руу түлхээд зогсохгүй Ерөнхийлөгчийн сонгуулийг хууль бусаар явуулах нөхцөл байдал үүсгээд байгааг анхаарууллаа.

Тэрээр хэлэхдээ: Үндсэн хуулийн дунд суудлын хуралдаан Д.Одбаяр, Д.Солонго, Г.Баясгалан, Ж.Эрдэнэбулган, Г.Туулхүү гэсэн бүрэлдэхүүнтэй хуралдаж, даргалагчаар нь Д.Одбаяр ажилласан. ҮХЦ-ийн гишүүд нь улс төрийн шийдлийн золиос, эрх баригчдын гар хөл болж, тэдний таашаалд нийцсэн шийдвэр гаргалаа. Өнөөдөр УИХ-ын гаргаагүй хуульд маргаан үүсгэн, дүгнэлт гаргаж байгаа нь Үндсэн хуулийн хямрал руу түлхэж байна.

Үндсэн хуулийн 66.2-ын нэгт ҮХЦ нь дараахь маргаантай асуудлаар дүгнэлт гаргаж, УИХ-д оруулна гээд тодорхой заасан байгаа. Үүнд: Хууль, зарлиг, УИХ, Ерөнхийлөгч, ЗГ-ын шийдвэр, Монгол Улсын гэрээ нь Үндсэн хуульд нийцэж байгаа эсэх талаар дүгнэлт гаргаж, УИХ-д оруулах ёстой.

Гэтэл УИХ-ын гаргаагүй шийдвэр дээр дүгнэлт гаргаж, Үндсэн хуулиа зөрчиж, улмаар хууль бус сонгууль зохион байгуулах асуудлыг хөндөж байгаад харамсаж байна. Энэ бол Монголын хуульчдын нэрийг шившиглэсэн үйлдэл гэлээ.

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.