"МЭК" ХХК-д хууль үйлчилдэггүйг улстөрчдийн рейтинг тогтоох судалгаа батлав

“Энэхүү судалгааг "МЭК" ХХК ямар нэгэн нам, байгууллага, хувь хүний захиалгаар бус, өөрийн санхүүжилтээр гүйцэтгэсэн болно” гэх тодотголтой судалгааг та бүхэн олонтаа харж байсан нь дамжиггүй. Тус судалгааны байгууллага нь Улаанбаатар хотын иргэдийн дунд судалгаа явуулж, дүнг нь олон нийтэд танилцуулдаг. 

Тэгвэл улс төрийн барометр ээлжит судалгааны дүнгээ өчигдөр танилцуулав. Судалгаагаар, Монгол Улсын Ерөнхийлөгч Х.Баттулгын рейтинг өсч, Л.Оюун-Эрдэнэ, У.Хүрэлсүх нарынх огцом унасан болохыг онцолжээ.

Энэ нь Ерөнхийлөгчийн сонгуульд зориулсан судалгаа болсон гэдгийг ч иргэд хэлж, шүүмжилж байгаа юм. Учир нь, Ерөнхийлөгчийн сонгуульд нэр дэвших магадлалтай хүмүүс эл судалгааны гол "бай" болсон нь  илт.

Угтаа Монгол Улсын Ерөнхийлөгчийн сонгуулийн тухай хуульд элжит сонгуулийн жил эхэлснээс хойш санал авах өдрийг дуустал хэвлэл мэдээллийн хэрэгсэл, цахим орчин, мессэж ашиглан улс төрийн чансаа тогтоох зорилго бүхий аливаа хэлбэрийн шалгаруулалт, санал асуулга зохион байгуулах, нийтлэхийг хориглосон байдаг. Тодотговол, Монгол Улсын Ерөнхийлөгчийн тухай хуулийн 43 дугаар зүйлд хууль бус сурталчилгааг хориглох гэсэн заалтын 43.1.Ээлжит сонгуулийн жил эхэлснээс хойш санал авах өдрийг дуустал, ээлжит бус, дахин сонгуулийн тухайд сонгууль товлон зарласан шийдвэр гарснаас хойш санал авах өдрийг дуустал аливаа этгээд сонгогчдын саналыг татах зорилгоор дараах үйлдэл, үйл ажиллагаа явуулахыг хориглоно:

43.1.8.хэвлэл мэдээллийн хэрэгсэл, цахим орчин, мессэж ашиглан улс төрийн чансаа тогтоох зорилго бүхий аливаа хэлбэрийн шалгаруулалт, санал асуулга зохион байгуулах, нийтлэхийг хориглоно" хэмээн заажээ. 

Харин "MEC" ХХК-д энэ хууль үйлчилдэггүй бололтой. Тиймдээ ч Ерөнхийлөгчийн сонгууль болоход хоёр сар хүрэхгүй хугацаа үлдээд байхад энэ мэтээр судалгаа гаргасан нь гайхшрал төрүүлж байгаа юм.

Б.Баатар