УИХ-ын гишүүн Л.Энх-Амгаланг Боловсрол, шинжлэх ухааны сайдад томилоход нийтээрээ, нийгмээрээ талархан хүлээн авсан.Түүнийг уналтад орсон боловсролын салбарыг хөл дээр нь босгоно, шинэчлэлийг эхлүүлнэ хэмээн ийнхүү итгэсэн хэрэг.

Өнгөрсөн хугацаанд Л.Энх-Амгалан сайдын гаргасан шийдвэрүүд алдаа, оноотой явж ирсэн ч сүүлийн үед тэрбээр боловсролын салбарт өшөөтэй мэт л хандах болжээ. Эсвэл ийн  аашлахаас өөр арга байгаагүй бололтой.

Тэрбээр “ Монгол Улсад 97 их, дээд сургуульд 156 мянган оюутан суралцдаг. Магадлан итгэмжлэлд тэнцсэн 36 их, дээд сургууль байгаа бол үлдсэн шаардлага хангаагүй бүх сургуулийн эрхийг цуцалж, хаах хэрэгтэй.  Үндсэндээ гурван сургуулийн хоёр нь  шаардлага хангахгүй байна гэдэг бол  иргэдийн халаасыг тэмтэрч, хүүхдэд нь цаасан диплом гардуулж, тоглож  байна гэсэн үг. 

Нөгөө талаар жилд 56 мянган оюутан  төгсөж байгаагийн 40 хувь нь ажлын байртай болдог гэдэг худлаа.

ДНБ-ий нэг хувийн өсөлтийн цаана 10-12 мянган ажлын байр гардаг гэж тооцвол, өнөөдрийн нэг хувийн эдийн засагтай манай улсад төгсөгчдийн 40 хувийг ажлын байраар хангах боломжгүй. 

Яам нь худлаа судалгаа хийдэг,  худлаа статистик тоо гаргадаг, түүндээ өөрсдөө итгэдэг. Бодлого хэрэгжүүлж байгаа хүмүүс нь буруу залснаас Боловсролын салбарын бодлогын алдаа эхэлдэг гэдгийг анхаарна уу, дарга нараа” хэмээн сэтгэгдлээ  хуваалцжээ. Хатуухан ч, үнэний ортой л байх. Гэлээ ч толгойлж буй салбарынхнаа доош хийсэн, үгүйсгэсэн сайдынх нь энэхүү мэдэгдэл, ардын олон багш нарын сэтгэлийг гонсойлгох нь лавтай. Үүний илрэл мэт, ШУТИС-ийн Үйлдвэрлэл, тeхнологийн дээд сургуулийн байрыг нурааж, Боловсролын үнэлгээний төв барихаар болжээ.

Бүхэл бүтэн салбар дээд сургуулийн 200 багш, 2000 оюутныг хөөж гарган чоно борооноор гэдэг шиг коронагаар далимдуулж, мэргэжлийн сургуулийн байрыг нь дээрэмдэх санаа яагаад төрөх болов. Хятадын элчингийн яг ард нь орших Үйлдвэрлэл, тeхнологийн дээд сургууль орчин цагийн чухал мэргэжилтнүүдийг бэлтгэдэг улсын цөөхөн дээд сургуулийн нэг. Гэтэл юуны учир гэдэг асуулт урган гарна.

Хотын төвийн А бүсэд том талбайтай газрыг нь шунан дээрэмдэж, оффисийн өндөр барилга болгоод, хэд нугалж зарах гэсэн санаа цухалзаж байж мэднэ. Эсвэл гадны элчингийнхэнд газартай нь найр тавьж өгөх гээд байна уу. Хаа байна тэр, сургууль, цэцэрлэгийн барилгыг өргөжүүлж, шинээр барина гэсэн амлалт Боловсролын сайд аа, хэмээн салбарынхан нь амыг нь асууж байна.

У.Тэргэл