“Хүчит шонхор” зах нийслэлдээ л монополь. Иргэд ч тийш хошуурч, хэрэгцээний махаа бэлтгэх нь зуршил болсон. Гэвч энэ захад цар тахлын энэ үед халдвар хамгааллын дэглэмийг сахьдаггүй, ариун цэвэр муу, гулууз махыг шороотой шидчихдэг, үнийг хөөрөгддөг зэрэг олон асуудал яригддаг. Хамгийн гол нь тус зах нь өнгөрсөн зургаадугаар сараас хойш үйл ажиллагаа эрхлэх зөвшөөрөлгүй явж ирснээс гадна захын бүх жин хэмжүүр хэмжилтийн гэрчилгээгүй зэрэг ноцтой зөрчлүүд ч бий.

Тиймээс Шударга өрсөлдөөн, хэрэглэгчийн төлөө газраас "Хүчит шонхор"  захад шалгалт оруулах гэхэд ил, далдаар нөлөөлж, ажлыг нь хийлгэхгүй байсан тул тэд цагдаагийн дэмжлэг аваад ч болов хууль зөрчсөн, хариуцлагагүй үйлдлийг таслан зогсооно гэж байв.

Эрүүл мэндийн сайд асан Т.Мөнхсайханы эзэмшлийн энэхүү захад ШӨХТГ-аас нэг сар орчмын хугацаанд хяналт шалгалт хийснээр дараах хариуцлагыг тооцжээ. Үүнд, “Хүчит шонхор” ХХК-ийг нь бүх нийтийн бэлэн байдлын зэрэгт шилжүүлсэн хугацаанд тодорхой шалтгаангүйгээр махыг худалдаалахгүй, төөрөгдүүлэх, үгсэн хуйвалдаж, үнэ тохирч худалдаалан ноёлох үйл ажиллагаа явуулсан хэмээн  үзэж, торгууль ногдуулсан байна. Ингэхдээ махны үнийг зохиомлоор хөөрөгдүүлж, дамлан худалдаалж буй нь нотлох баримтаар тогтоогдсон тул жилийн борлуулалтын орлогын 4 хувиар буюу 29,140,676 (Хорин есөн сая нэг зуун дөчин мянга зургаан зуун далан зургаан) төгрөгөөр торгожээ.

У.Тэргэл