Монгол Улсын Ерөнхийлөгчид нэр дэвшигчид хөрөнгө, орлогын мэдүүлгээ Авлигатай тэмцэх газарт мэдүүлэх үүрэгтэй. Тодруулбал, Авлигын эсрэг хуулийн 10 дугаар зүйлийн 10.6 дахь хэсэг, 11 дүгээр зүйлийн 11.2 дахь хэсэг, Монгол Улсын Ерөнхийлөгчийн сонгуулийн тухай хуулийн 28 дугаар зүйлийн 28.2.3 дахь хэсэгт заасны дагуу Монгол Улсын Ерөнхийлөгчийн сонгуульд нэр дэвшигч нь хөрөнгө, орлогын мэдүүлгээ Авлигатай тэмцэх газарт гаргаж бүртгүүлэх үүрэгтэй хэмээн заасан байдаг. Энэ дагуу Авлигатай тэмцэх газраас нэр дэвшигчийн хөрөнгө, орлогын мэдүүлэг гаргах эрхийг https://meduuleg.iaac.mn/ цахим системд үүсгэн, уг мэдүүлгийг бүртгэж хүлээн авах үйл ажиллагааг хуульд заасны дагуу 2021 оны тавдугаар сарын 3, 4-ны өдрүүдэд зохион байгуулахаар бэлтгэлийг хангаад байна.
Монгол Улсын Ерөнхийлөгчийн сонгуулийн тухай хуулийн 28 дугаар зүйлийн 28.10 дахь хэсэгт заасны дагуу сонгуульд нэр дэвшигчийн цахим системд мэдүүлсэн ХОМ-ийг 2021 оны тавдугаар сарын 24-нөөс эхлэн тус газрын цахим хуудаст нээлттэй байршуулах аж.
2021 оны дөрөвдүгээр сарын 21-ний өдөр Сонгуулийн ерөнхий хорооноос зохион байгуулсан онлайн уулзалтад тус газрын холбогдох албан тушаалтнууд оролцож, дээрх асуудлаар дэлгэрэнгүй мэдээллийг хүргэсэн ба уулзалтад Монгол Улсын Ерөнхийлөгчийн 2021 оны ээлжит сонгуульд оролцох нам, эвсэл, төрийн болон төрийн бус байгууллагуудын 40 орчим төлөөлөл оролцож, асуулт хариулт өрнүүлэн, санал солилцжээ.
АТГ-аас мөн Сонгуулийн ерөнхий хороотой хамтран “Монгол Улсын Ерөнхийлөгчид нэр дэвшигч танаа” гарын авлагыг боловсруулж, холбогдох хүмүүст хүргүүлээд байна.
