“Ард түмнээ хайрлая” намаа эхнэр Л.Аззаяагийнхаа нэр дээр саяхан шилжүүлсэн Л.Гүндалай өнөөдөр Монгол Улсын Ерөнхийлөгчийн сонгуульд нэр дэвшин өрсөлдөхөө албан ёсоор зарлалаа. Тэрбээр “Миний нэрийг Ламжавын Гүндалай гэдэг. Та бүхэн бүгдээрээ мэднэ дээ. Гэхдээ энэ удаа нэр, усаа хэлчихье гэж бодлоо. За, би Монгол Улсын Ерөнхийлөгчийн сонгуульд өрсөлдөхөөр өөрийнхөө хувьд шийдвэрээ гаргасан. Аль нэг нам, эвсэл намайг нэр дэвшүүлнэ гэж яриагүй, тийм зүйл болоогүй. Гэхдээ өнөөдөр Монгол Улсад Монголын төлөө гэсэн цохилох зүрхтэй, сэтгэлтэй, улсаа өөрчилж, шинэчилж чадах Ерөнхийлөгч, удирдагч ус, агаар мэт маш их хэрэгтэй байгаа.

Миний бие энэ шалгуурт өөрийгөө тэнцэнэ гэж бодож, сонгуульд өрсөлдөхөөр өөрийн зүгээс нэрээ дэвшүүлээд байгаа юм. Би айлын найм дахь хүүхэд. Наймын тоо хүнийг баяжуулдаг юм гэнэ билээ. Би ямар ч байсан гэр бүлээ бол баяжуулсан. Монголын бүх хүүхдийг, тэдний гэр бүлийг хүүхдийн мөнгөөр баяжуулсан хүн. Бяцхан ч гэсэн тус нэмэр болж байгаа байх. Би Монголын ард түмнийг зовхи өөдөө, баян сайхан байгаасай гэж, баяжуулахын төлөө сэтгэл санаа зовж явдаг хүн. Би АН-аас салаад нам байгуулаад явсан түүх бий. Цаад учир нь, Монгол Улсын Ерөнхийлөгчид нэр дэвших, тэр суудлыг нам дээрээ авъя гэсэн, тийм л бодолтой байсан юм. Харамсалтай нь, бүтээгүй. Одоо бол би биеэ, гэрээ засчихсан, төрөө засахад надад бүх зүйл бий” гэлээ.

Л.Аззаяа нь УИХ-ын 2016 оны сонгуульд Орхон аймагт нэр дэвшин өрсөлдөж байсан бол Л.Гүндалай ийнхүү Монгол Улсын Ерөнхийлөгчийн сонгуульд нэр дэвших бүх болзлоо хангасан гэж үзэн, өрсөлдөхөө мэдэгдлээ.

У.Тэргэл