Улсын онцгой комиссын дарга, Шадар сайд С.Амарсайхан уржигдар найман телевизээр шууд ярилцлагад орохдоо олон ноцтой баримтыг дэлгэсэн юм. Эмнэлгийн удирдлагууд цүнх цүнхээр мөнгө авч, улсаас үнэгүй хийж байгаа шинжилгээний урдуур уул уурхайнхыг оруулдаг, хүссэн хариугаа сөргөөр, хүсээгүйгээ эергээр шивдэг гэх зэрэг асар ноцтой, нийгмийн эрүүл мэндийн эсрэг гэмт хэргийн шинжтэй зүйлүүдийг шууд эфирээр шууд ярилаа. Халдварт өвчин судлалын үндэсний төвийн улаан шугамын доторхи зүрх эмтрэм дүр зургийг дэлгэхийн сацуу духны гэрэл зүүгээд хагалгаа хийдэг газар ХөСҮТ-өөс өөр хаана ч байхгүй гэж хачирлав.

Гадаад дотоодын тусламжууд нь эмнэлгийн дарга нарт л очдог, гэтэл эмнэлгийн үнэн дүр зураг нь ийм байна хэмээн ярьсан Шадар сайдын үгэнд итгэж байна.

Гэтэл ХөСҮТ-ийн үнэн төрх бол яг үнэндээ Монгол Улсын өнөөгийн дүр төрх, схемийн жижигрүүлсэн хувилбар л шүү дээ. Тансаг хаусаасаа гарч, 570-аасаа буугаад алхвал алхам бүрт нь уг нь “ХөСҮТ” байгаа л юм. ХөСҮТ ийм байгаа нь удирдлагуудынх нь буруу гэдэг нь гарцаагүй ч Монгол Улс бүхэлдээ “ХөСҮТ” болчихоод байгаад сүүлийн хоёр ч сонгуулиар 60-аас дээш суудал авч үнэмлэхүй олонхи болсон Ардын намын, Ардын намаас томилогдсон Шадар сайд яагаад буруугүй болчихдог билээ?

Цүнх цүнхээр мөнгө авдаг, эерэг хариуг сөрөг гээд шивдэг эмнэлгийн ажилтнууд байдаг юм бол яагаад хариуцлага хүлээлгээд явуулахгүй байна вэ. Дахиад хэдэн хүнд сөрөг гэсэн бичгийг хуурамчаар хийж өгч, дахиад хэдэн хүнийг цар тахлаар алдсаны дараа хариуцлага ярих гэж хүлээнэ вэ?

Хэрэв Шадар сайдын шууд эфирээр ярьсан бүхэн үнэн бол тэр эмч, эмнэлгийн ажилтнуудад хариуцлага тооцож, цаашлаад ял асуухгүй яагаад өнөөг хүртэл ажлыг нь хийлгэсээр байна вэ. Ийм хариуцлага ярихгүй байж эфир бүрээр эмч, эмнэлгийн ажилтнуудыг харлуулж баймааргүй байна. Үүний үр дагавар ч байж мэдэхээр харамсалтай мэдээ хэд хоногийн өмнө дуулдсан. Ковидоор өвдсөн хүмүүс нь эмч, сувилагч руугаа юм шидэж хөөж туусан тухай... Гэтэл өнөөдөр улаан шугамын дотор ажиллаж байсан сувилагч өндрөөс унаж амиа алдсан гунигтай мэдээлэл бас л сонсогдлоо. Нэр заагаад хэлж чадахгүй, нийтэд нь харлуулж ярьдгаас нь болоод энэ нь эмч, эмнэлгийн ажилчдад эргээд дарамт болон ирж байна.

Тиймээс цүнхтэй мөнгө аваад уул уурхайнхны шинжилгээг хийдэг эмнэлгийн нэрийг нь зарла, удирдлагуудад нь хариуцлага тооц. Эерэг шинжилгээг сөрөг болгон шивдэг эрх бүхий эмч нар нь хэн байв, түүнийгээ зарла. Эс бөгөөс нэргүй сураг хэлж нийт эрүүл мэндийн ажилтныг эрсдэлд битгий оруул аа, Шадар сайд аа.

Арван жил эмнэлгийн дарга хийгээд гайхамшгийг бүтээчихсэн мэтээр ярьдаг эмнэлгийн удирдлагуудын үнэн царай энэ байна гээд Та улаан шугамын доторхи зураг үзүүлсэн. Сэтгэл эмтрэм дүр зураг байна лээ. Одоо та нүдээ нээ, арван жил удирдсан улс орноо хар. Зүрх зүсэм биш байна гэж үү? Дарга нар нь идэж уудаг, илүү эрх эдэлдэг наад булай бүхнээ холоос биш өөрөөсөө хай. Алдаа бүхнээ бусад руу чихэхийн оронд ажилдаа эзэн шиг хандмаар байна, Шадар сайд аа. С.Амарсайханд алдах юм нь албан тушаал л байж болох ч Ардын намд айх айдас бий шүү. Ердөө сар гарангийн дараа Ерөнхийлөгчийн сонгууль болох гэж байхад МАН-аас томилогдсон Улсын онцгой комиссын дарга нь улсдаа болж байгаа онцгүй бүхнийг өөрөөсөө холдуулаад сууж баймааргүй байна.

С.Сүлд