УИХ-ын гишүүн Б.Дэлгэрсайхан, Т.Энхтүвшин нарын “зугаалга” дуусахгүй нь. Тэд Улаанбаатар хотод хөл хорио тогтоохтой зэрэгцэн тойргоо услахаар нутгийн зүг хүлгийн жолоо залж, халдвар хамгааллын дэглэм зөрчиж байгаа талаар бид өмнө нь мэдээлж байсан билээ.

Тэдний “зугаалга” одоо ч дуусаагүй төдийгүй сум бүрээр айлчилж явна. Тодруулбал, Б.Дэлгэрсайхан гишүүн Дорноговь аймгийн урд талын сумдаар, Т.Энхтүвшин гишүүн хойд талын сумдаар тойрч яваа аж.

Ингэхдээ төрийн албан хаагчдыг олноор нь цуглуулж, онцгой байдлын эл үед сайн ажиллаж байгааг сайшаан магтаж, урамшуулал нэрээр хүн бүрт 30 мянган төгрөг тараасан байна. Мөн “Аймгийн аварга малчин”, “Алтан төлийн эзэн” тэмдэг гардуулж яваа аж. Дорноговь аймагт коронавирусний халдвар 61 тохиолдол бүртгэгдэж, хэдэнтээ хатуу хөл хорио тогтоосон. Өнөөдөр ч хоёр тохиолдол бүртгэгдсэн байна.

Дорноговь аймгийн Эрүүл мэндийн газраас “Улаанбаатар хот болон эрсдэлт бүс нутгаас ирсэн хүнтэй уулзсан эсвэл гэрт тань хоноод буцсан ч танай гэр бүлийн бүх гишүүн гэрийн хяналтад шилжиж, долоо хоног тусгаарлагдах"-ыг анхааруулсан байна. Ингэхээр Улаанбаатар хотоос очсон эрхэм гишүүдтэй уулзалт хийсэн сумдын төрийн албан хаагчид төдийгүй тэдний гэр бүл бүгд тусгаарлагдана гэсэн үг. Тэгвэл энэ дүрэм журам биелж байгаа болов уу гэдэг мэдээж эргэлзээтэй. Тэдэнд цар тахлын үед дагаж мөрдөх хууль, журам үйлчилдэггүй бололтой.

Монгол Улсын Шадар сайд, Улсын онцгой комиссын дарга С.Амарсайхан өчигдөр аймгийн Засаг дарга нартай цахим уулзалт хийж, Өмнөговь, Дорнод, Дорноговь зэрэг хилийн боомт бүхий аймгийн удирдлагууд халдвар хамгааллын дэглэмийг дээд зэргээр сахиж, ажиллахыг онцгойлон анхааруулсан.

Гэтэл эрхэм гишүүд эрх дураараа зугаалж, халдвар хамгааллын дэглэм зөрчиж явна. Харин энэ бүхнийг Онцгой комиссын дарга, Шадар сайд С.Амарсайхан мэдсэнгүй юу. Мэдэхийг ч хүссэнгүй юу.

Ямартай ч, иргэдийг эрсдэлд оруулж буй эрхэм гишүүдээ татаж авахыг Дорноговьчууд хүсэж байна Шадар сайд аа. 

Б.Баатар