Нийслэлийн болоод Дархан, Хархорин дахь цагдан хорих ангиудад коронавирусний халдвар авсан хоригдол, хоригдогсдын тоо одоогийн байдлаар 400 дөхөөд байна. Гэтэл төсөв мөнгийг нь хуваарилаагүйгээс хорих ангиудад нөхцөл байдал хүндэрч,  хоол хүнсний дутагдалд орж, эмнэлгүүд нь ч эм, тарианы хомсдолд орж, хорих ангиуд халдварын томоохон голомт болоод байна. Хэдийгээр олон улсын зөвлөмжид халдварын ойрын хавьтлыг нэг, нэгээр нь тусгаарлах зөвлөмжийг өгч байгаа ч хорих ангиудад ийм боломж байхгүйгээс 2-8-аар нь тусгаарлаж, эрсдэлийг улам нэмэгдүүлж байна. Мөн хорих ангиудын эмч, алба хаагчид анги дээрээ байрлаж, уртасгасан цагаар ажиллаж буй нь тэдний гэр бүлийнхэн ч эрсдэлд ойр байгааг харж болно.  Хамгийн гол нь хорих ангиудад агаар сэлбэлт муу, хоригдлыг нэг нэгээр нь тусгаарлах нөхцөл байхгүй, хоолны илчлэг чанар гэж үгүй зэргээс хамаарч халдвар улам тархах нөхцөл энд бүрджээ.  

Хууль зүйн сайд нь энд улстөржин гүйж явах зуурт хорих ангиуд нь халдварын томоохон голомт болчиход байгаад эрхэм сайд гар сунган хэрэгцээт зүйлсээр тусалж, хангадаггүй юм гэхэд төсөв мөнгийг нь яаралтай хуваарилж өгөөч.

Төсөв мөнгөгүйгээс хорих ангиуд урд хормойгоороо хойд хормойгоо нөхөж, энд тэндээс гуйлгачлан бадарчилж өдөр хоногийн өнгөрүүлж байна. Ядаж байхад халдварын голомт улам тэлж, ташраараа коронавирусээр өвчлөх нөхцөл байдал тэнд үүсчихлээ.

Хорих ангийн эмнэлгүүд хэр чадлаараа өвчтөнүүдээ эмчилж, өнөөдрийн байдлаар 109 нь эдгэрсэн ч гэлээ цаашид халдварыг тогтоон барих боломж улам бүр хомсдож байгааг ШШГЕГ-ынхан хүлээн зөвшөөрөхөөс аргагүй байдалд хүрч байна.

Хууль зүйн сайд Н.Нямбаатар та, энэ их улс төрийн хажуугаар үндсэн ажлаа хийвэл яасан юм бэ. Таны хариуцсан салбарт коронавирусний халдвар дэгдээд даруй хоёр сар орчим болж байгаа ч та үүнд анхаарал хандуулж, хуруугаа ч хөдөлгөсөнгүй.  Төсөв мөнгийг нь ч шийдэж өгөхгүй байж үүрэг даалгавар өгсөн маягтай суугаа нь хэр зохимжтой вэ. Ядаж, хөрөнгө мөнгийг нь шийдчихээд зааж, зааварлаж суувал ямар вэ. Өнөөдрийн байдлаар 400 орчим хоригдол, ажлаа хийж буй эмч, ажилтан гээд олон зуун хүний хувь заяагаар тоглох эрх танд байхгүй.

У.Тэргэл