Улс төрийн нам, эвслүүд Монгол Улсын Ерөнхийлөгчид нэр дэвшүүлэх ажиллагаа өнөөдөр эхэлж, сонгуулийн сунгаанд өрсөлдөх эрхмүүдийн нэр тодорсоор байна. Тухайлбал, нэг өдрийн дотор МАХН-ын гишүүнчлэлээс татгалзаж, О.Цогтгэрэлийн АН-д элссэн С.Ганбаатар Монгол Улсын Ерөнхийлөгчийн сонгуульд нэр дэвших материалаа АН-ын дотоод сонгуулийн хороонд өглөө. Тэрбээр "Ерөнхийлөгч гэдэг албан тушаалын мөн чанар нь эрх баригчдад хяналт тавьдаг,төсөв, тендерийн шахаа их байна. Үүнийг зогсоохын тулд өөрийн бүх бололцоогоо ашиглана. Намын дотоод сунгаанд хэн ч ялсан байсан дэмжиж, ажиллана. Хэрэв би ялбал уул уурхайн ашгийг иргэддээ хүртээнэ " гэв.

Түүнчлэн УИХ-ын гишүүн асан Х.Тэмүүжин Ерөнхийлөгчийн сонгуульд Ардчилсан намаас нэр дэвших хүсэлтээ илэрхийлэн бүртгүүллээ.  Ерөнхийлөгчийн сонгуульд АН-аас нэр дэвшигчийн бүртгэл өнөөдөр 15:00 цаг хүртэл үргэлжлэх юм. Урьд өмнө тус намаас  Ц.Оюунгэрэл, Р.Амаржаргал нар албан ёсоор нэрээ дэвшүүлж, Ерөнхийлөгчийн сонгуулийн сунгаанд өрсөлдөхөө мэдэгдсэн билээ.

У.Тэргэл