Улс төрийн намууд Ерөнхийлөгчийн сонгуульд нэр дэвшигчээ тавдугаар сарын 2 буюу энэ ням гарагт тодруулж, тавдугаар сарын 5-наас өмнө материалыг нь Сонгуулийн ерөнхий хороонд хүргүүлэх ёстой.

Энэ удаагийн Ерөнхийлөгчийн сонгуульд хамгийн адармаатай байгаа нь Ардчилсан нам юм. Одоогийн байдлаар М.Тулгат даргатай АН-аас Ц.Оюунгэрэл, Р.Амаржаргал нар нэр дэвшихээ зарлаад буй. Харин О.Цогтгэрэл даргатай АН-аас УИХ-ын гишүүн Н.Алтанхуяг, С.Ганбаатар, Хууль зүйн сайд асан Х.Тэмүүжин, АН-ын бүлгийн дарга Д.Ганбат нар нэр дэвшихээ илэрхийлж, Дотоод сонгуулийн хороонд бүртгүүлээд байгаа. Дотоод сонгуулийн хорооноос сонгогдсон нэр дэвшигчийн материалыг Сонгуулийн ерөнхий хороонд хүргүүлэх ба тус хороо АН-аас нэр дэвшигчдийн чухам хэнийг нь бүртгэхээ шийднэ.

Харин МАН-ын хувьд энэ ням гарагт буюу тавдугаар сарын 2-нд Бага хурлаа хуралдуулж, Ерөнхийлөгчийн сонгуульд нэр дэвшүүлэх хүнээ тодруулахаар болжээ. Тус намаас Ерөнхийлөгчийн сонгуульд намын дарга У.Хүрэлсүхийг нэр дэвшүүлэх нь нэгэнт тодорхой болсон. Тиймээс Бага хурлаараа 100 хувийн саналаар дуу нэгтэйгээр батлах биз ээ. МАХН-ын тухайд Ерөнхийлөгчийн сонгуульд оролцохгүй, МАН-аас нэр дэвшигчийг дэмжиж ажиллана гэдгээ мэдэгдсэн.

“Зөв ХҮН электорат” эвслийн тухайд тавдугаар сарын 2-нд хуралдаж, нэр дэвшигчээ тодруулах мэдээлэлтэй байна. Тэд өнгөрөгч хоёрдугаар сараас “Ерөнхийлөгчөө захиалъя” аяны хүрээнд цахимаар санал асуулга явуулж эхэлсэн ч ШӨХТГ-аас Шударга өрсөлдөөний тухай хуулийг зөрчсөн хэмээн зогсоосон билээ. Урьдчилсан мэдээллээр, тус намаас дөрвөн улстөрч Ерөнхийлөгчийн сонгуулийн сунгаанд оролцохоо илэрхийлсэн сурагтай байна.

У.Тэргэл