Иргэний Зориг Ногоон нам, Монголын Уламжлалын нэгдсэн нам хамтран нэгэн хачирхалтай мэдэгдэл гаргажээ. Үүнд, Та бидний эвслийг Ерөнхийлөгчийн сонгуульд нэр дэвшүүлэн оролцох боломжгүй болголоо гээд үүний буруутан нь УИХ-ын гишүүн С.Ганбаатар гэлээ.

Мэдэгдэлд, УИХ-ын 2020 оны ээлжит сонгуульд Та Бидний эвслийн сонгуулийн мөрийн хөтөлбөрийг хэрэгжүүлэхээ амлан нэр дэвшиж өрсөлдөн, Орхон аймгийн сонгогчдын итгэлийг өвөртлөн УИХ-ын гишүүнээр сонгогдсон С.Ганбаатар нь Эвслийн удирдлагад мэдэгдэлгүйгээр Эвслээс гарч, АН-ын гишүүнээр элссэн тухай хэвлэл мэдээллээс олж мэдлээ.

Иргэний Зориг Ногоон нам, Монголын Уламжлалын нэгдсэн намын удирдлагатай саяхан хэдэнтээ уулзахдаа УИХ дахь Та Бидний эвслийн төлөөллөө хадгалан, 2024 оны УИХ-ын ээлжит сонгууль хүртэл идэвхтэй хамтран ажиллахаар санал нэгдэж байсан С.Ганбаатар энэ үйлдлээрээ Эвсэл Монгол Улсын Ерөнхийлөгчийн сонгуульд нэр дэвшүүлэн оролцох бололцоогүй болголоо. Энэхүү үйлдлийнхээ хариуцлагыг тэрбээр хүлээх ёстой.

Та Бидний эвслийн нэр дэвшигч С.Ганбаатарт итгэлээ өгсөн Орхон аймгийн сонгогчдын эрх ашгийг хөсөрдүүлэх ёсгүй гэдгийг мэдэгдэж байна. С.Ганбаатарын энэхүү туйлбаргүй явцуу үйлдлийг өөгшүүлэн дэмжихгүй байхыг АН-ын удирдлага, гишүүдэд уриалж байна гэжээ.

У.Тэргэл