Монголчууд шинэ Төрийн тэргүүнээ сонгоход ердөө сар гаруйн хугацаа үлдлээ. СЕХ Ерөнхийлөгчийн сонгуулийн цаг хугацааны хуваарийг баталсаны дагуу УИХ-д суудалтай улс төрийн намууд сонгуульд нэр дэвшигчдээ тодруулж эхлээд байна.

АН-ын хувьд О.Цогтгэрэл даргатай, М.Тулгат даргатай гэж хоёр хуваагдаад байгаа билээ. АН хоёр талд Ерөнхийлөгчийн сонгуульд өрсөлдөх хүсэлтэй хүмүүсийн материалыг өчигдөр бүртгэсэн. О.Цогтгэрэлийн АН-аас УИХ-ын гишүүн Н.Алтанхуяг, С.Ганбаатар, УИХ-ын гишүүн асан, ХЗДХ-ийн сайд асан Х.Тэмүүжин нар холбогдох материал, хүсэлтээ хүргүүлээд байна. Харин М.Тулгатын талаас Ерөнхийлөгчийн сонгуульд өрсөлдөхөөр, мөн УИХ дахь АН-ын бүлгийн дарга Д.Ганбат болон Ерөнхий сайд асан Р.Амаржаргал, УИХ-ын гишүүн асан Ц.Оюунгэрэл, Л.Гүндалай, С.Эрдэнэ нар материал, хүсэлтээ илэрхийлээд байгаа юм.

Тэгвэл Улсын Дээд шүүхээс АН-ын даргыг С.Эрдэнэ хэвээрээ хэмээсэн. Иймд О.Цогтгэрэлийн АН-аас нэр дэвшсэн хүмүүс Ерөнхийлөгчийн сонгуульд нэр дэвших найдвар тун бага. Учир нь Сонгуулийн ерөнхий хороо хууль ёсны тамга, тэмдэгтэй буюу С.Эрдэнийн АН-ын нэр дэвшигчээс бүртгэх нь гарцаагүй.

Хууль бус АН-аас нэр дэвшсэн ч СЕХ бүртгэхгүй гэдгийг Ерөнхийлөгч Х.Баттулга, УИХ-ын гишүүн  С.Ганбаатар хамгийн сайн мэдэж байгаа. Түүнийг одоогийн Ерөнхийлөгч илт дэмжиж байгаа. Тиймээс нэр дэвших гэж зүтгэж байгаа зорилго нь нэр дэвшихдээ бус АН-ын дотор үймээн дэгдээх, АН-ыг сонгуульд оролцуулахгүй байх үйлдэл гэж харж болохоор байна.  Бүр тодруулж хэлбэл, Х.Баттулга өөрийн талын АН-аас л биш бол С.Эрдэнийн талын АН-ыг сонгуульд оролцуулахгүй гэсэн санаа харагдаж эхэллээ. Нөгөө талаас өөрөө нэр дэвших боломжгүй болсон учир Ерөнхийлөгчийн сонгуулийг будилуулж, эмх замбараагүй байдал бий болгох гэсэн өс хонзонгийн санаа агуулж байж ч мэдэх юм.