Ерөнхийлөгчийн сонгуулийн тухай хуулийн дагуу өчигдрөөс нам, эвсэл нэр дэвшигчээ тодруулах хугацаа эхэлсэн.   

Энэ дагуу Ардчилсан нам өчигдөр нэр дэвшигчдийн материалыг хүлээж авахад  Н.Алтанхуяг, С.Ганбаатар, Д.Ганбат, Х.Тэмүүжин нар бүртгүүлсэн байна. Харин эдний дунд санал асуулга явуулж, гишүүдийн дунд нууц санал хураалт явуулснаар нэр дэвшигчээ тодруулна гэдгээ мэдэгдсэн. 

Харин Монгол Ардын нам маргааш бага хурлаа хуралдуулж, Ерөнхийлөгчийн сонгуульд нэр дэвшүүлэх хүнээ тодруулахаар болжээ. Эх сурвалжийн мэдээлж буйгаар тус намаас У.Хүрэлсүх, Г.Занданшатар, Ч.Хүрэлбаатар, С.Батболд  Д.Сарангэрэл нарыг нэр дэвшүүлэн, санал авахаар бүх шатны намын хороо руугаа албан тоот илгээсэн аж. Улмаар хамгийн өндөр санал авсан нэр дэвшигчдийг намын бага хурлаар тодруулах юм байна.

Улсын Их хуралд суудалтай ХҮН нэр дэвшигчээ маргааш тодруулах бөгөөд олны танил хэд хэдэн хүнд санал тавьсан гэх. Эх сурвалжийн мэдээлснээр УИХ-ын гишүүн асан Д.Энхбат, С.Оюун, Сонгодо эмнэлгийн захирал, эмч Б.Болдсайхан, "Де Факто" ярилцлагын хөтлөгч, эдийн засагч Д.Жаргалсайхан, нийтлэлч Баабар буюу Б.Батбаяр нарт Ерөнхийлөгчид нэр дэвших санал тавьсан байна. Харин эдгээр эрхмүүдээс эдийн засагч Д.Жаргалсайхан Ерөнхийлөгчийн сонгуульд өрсөлдөх боломжгүй гэдгээ илэрхийлжээ. 

Нам, эвсэлүүд маргаашийн дотор нэр дэвшигчээ тодруулж, тавдугаар сарын 5-ны дотор Сонгуулийн ерөнхий хороонд баримт бичиг, мөрийн хөтөлбөр хүргүүлэх ёстой юм.

Б.Баатар