Монгол Улсын Ерөнхий Л.Оюун-Эрдэнэ сайд бухимдангуй нэгэн мэдээлэл хийсэн нь нийгэмд цар тахлын энэ үед хэн гэгч нь ийнхүү төр, улсынхаа эсрэг зогсож чадав, нэрийг нь зарла хэмээн шаардаж эхэллээ. Ялангуяа Ерөнхий сайд улстөрчид хэмээн олон тоон дээр зарлаж, тэднийг бүр алиа салбадай хэмээн нэрийдэн, нэр устай чинь удахгүй зарлана шүү гэдгийг хэвлэл мэдээллээр дайлаа.

Тодруулбал, Л.Оюун-Эрдэнэ сайд “Цар тахлын энэ үед аливаа бүхнийг улстөржүүлж, үүндээ Эрүүл мэндийн салбарын ажлаа хийгээд яваа ажилтан албан хаагч, онцгой байдлын албан хаагчийг, вакцинжуулалтыг оролцуулж байна. Улстөрчид нэг ч вакцин авчирч, нэг ч вакцин үйлдвэрлэж чадахгүй байж, нэмэр болохоосоо илүү битгий гай болооч ээ. Зарим вакцины татан авалтад манай зарим улстөрчдийн хариуцлагагүй асуудал нөлөөлсөн. Миний хувьд цар тахлын хажуугаар улстөржихгүй явах гэж хичээж ажиллаж байна. Гэхдээ би тэвчээд дуугүй яваад байдаг зан харилцаатай хүн биш. Шаардлагатай бол тэр гишүүдийг би зарлана. Энэ цаг үед ард түмний эрүүл мэнд,  эрүүл мэндийн системийн эсрэг, хариуцлагагүй мэдэгдэл хийж, энд тэнд буруу мэдээлэл өгч байгаа нь өөрөө эх орноосоо урвасан үйлдэл. Үүнийг зарим нэг улс төрийн алиа салбадай нарт хатуу анхааруулъя. Удахгүй цар тахал гайгүй болохоор хэлэх ёстой газар нь хэлнэ. Иргэд маань улс төрийн хөөсрөлд автахгүйгээр урдаа тавьсан зорилгоо л хамтдаа хэрэгжүүлэх нь чухал гэдгийг хэлэхийг хүсч байна" гэлээ.

Тэвчинэ тэвчинэ гэхэд яаж тэвчих вэ. Хэвлэлээр хэлэх гэснээ хэлж, зарим улстөрчдөд сануулчихлаа. Харин тэдгээр улстөрчид нь хэн бэ.

Энэ тэргүүнд Монгол Улсын Ерөнхийлөгчид энэхүү үгийг дайсан хэмээх хардлага нийтэд байна. Тэрбээр ОХУ-ын Төрийн өндөр албан тушаалтнуудтай холбогдон “Спутник-V” вакциныг  Монгол Улсад үйлдвэрлэх санал дэвшүүлж, Оросын тал ч боломжийг судлах ажлын хэсэг гаргалаа хэмээж байсан. Энэ нь сайхан мэдээ байсан ч удалгүй манай Ерөнхийлөгчийн утсыг ч авахаа байлаа, айлчлах гэсэн саналд хариу өгөхгүй юм гэх гомдол хөвөрсөн. Угтаа бол Төрийн тэргүүн маань ОХУ-д өөрийн биеэр очиж, вакцинаа ч, үйлдвэрлэх эрхээ ч давхар олж ирэх төлөвлөгөөтэй байсан ч энэ нь нуран унасан тул шаралхсандаа хэдэн хатуу үг шидсэн. Энэ нь вакцины нийлүүлэлтэд тодорхой хэмжээгээр нөлөөлсөн гэх хардлага байна.

Нөгөөтэйгүүр, Шадар сайд С.Амарсайханыг Ерөнхий сайд зэмлэсэн сураг дуулдаж байсан. Цар тахлын хажуугаар улстөржиж, ганц, нэг хүний алдаан дээр дөрөөлж, бүхэл бүтэн эрүүл мэндийн салбарыг харлуулах гэлээ гэж. Ажлынх нь энэ их ачааллын хажуугаар сэтгэл санааг нь үймүүлдгээ боль. Тэр шалгадаг газар нь шалгаад шийднэ биз. Тэгээд ч та хариуцаж буй ажлаа өөрөө харлуулаад байна хэмээсэн гэдэг. УОК-ын дарга С.Амарсайхан “ХӨСҮТ-ийн ажилчид хэдэн зуун шинжилгээний хариуг мөнгөөр засварладаг, эхнэр нь нөхрийнхөө өмнөөс шинжилгээ өгч нөгөөх нь хөдөөгүүр тэнэж явдаг, энэ замбараагүй байдал халдварыг нийгэм тархахад ихээхэн нөлөөлсөн” хэмээж байв. Харин ХӨСҮТ-ийн болоод эрүүл мэндийн салбарынхан жагсаал зохион байгуулж, хариуцлагагүй ганц, нэг хүний үйлдлээс болж цаг, наргүй ажиллаж байгаа биднийг Шадар сайд хамтатган гүтгэлээ. Үнэн мөнийг тодруулахын тулд УОК-ын даргыг шүүхэд өгч байна мөн мэдэгдсэн юм.

Цаашаад УИХ-ын чуулганд сөрөг хүчнээ л доош хийж байвал бах нь ханадаг Д.Ганбат гишүүн ч Ерөнхий сайдын хэлсэн алиа салбадай нарын нэгт орно гэгдэж байна. Тэрбээр чуулганы танхимд бүхнийг улстөржүүлж, амны дор хагарай гэгчээр аашилдаг нь өөрөө ч мэдэлгүй элдэв асуудал үүсгэдэг байна. Ямартай ч, Ерөнхий сайд энэ удаад хүний, өөрийн гэлтгүй үгээ хэлчихлээ. Харин нэр усыг нь нийтэд нээлттэй зарлах эсэх нь эргэлзээтэй байна.  Манай Ерөнхий сайд далайлт нь ширүүн ч буулт нь зөөлөн. Ингэсхээд л замхарна гэдгийг олон нийт хэлж байна. Олны үг ортой ч байж болзошгүй юм.

Ямартай ч, иргэдийн ам дамжин ярих таамаг энэ байна. Хэвлэл мэдээлэл, иргэд ч хардах эрхтэй. Харин цар тахлын үеэр улстөржиж, эх орноосоо урвасан  жинхэнэ алиа салбадай нар хэн бэ. Тэднийг нэрлэнэ үү, Ерөнхий сайд аа!

У.Тэргэл