Вакцины эхний болоод хоёрдахь тундаа хамрагдах гэсэн иргэдийн цуваа хэсэгтээ тасраагүй. Дугаарласан иргэд хөл гишгэх зайгүй болж, халдвар чинь энд л тархлаа гэсэн шүүмжлэл хэсэгтээ өрнөсөн. Гэтэл сүүлийн хэдэн өдөрт вакцинжуулалтын цэг хоосорч, гиеүрсэн эмч, эмнэлгийн ажилчид л байх болсон.

Нийслэлчүүдийн 41 хувь буюу 470 мянган иргэн вакциндаа хамрагдаагүйг албаныхан хэлж байгаа. Хатуу хөл хорионы энэ цагт л амжиж бүх иргэнээ вакцинжуулна гэсэн төр, засгийн бодлого алдагдаж, ямар сайндаа л Шадар сайд С.Амарсайхан “Аминчлан гуйя. Вакцинжуулалтдаа хамрагдана уу” хэмээн вакцины цэг дээрээс бичлэг хийж хүртэл цацаж байх вэ.  Харин тавдугаар сарын 8-наас хөл хориог сулруулмагц вакциныг төлбөртэйгөөр хийнэ гэсэн мэдээллийн дагуу иргэд нэг, хоёр хоногт идэвхийлэн оролцсон. Ташаа ч гэсэн энэ мэдээлэл хэдэн хүнийг ч болов вакцинжуулаад амжсан юм.

Иргэдийн хувьд янз бүрийн шалтгаантайгаа хэлж байна. Суурь өвчтэй, хавдартай, харшилтай, хэсэг харзнана, жирэмсэн, хөхүүл, Хятадынх бус ОХУ-ынхыг хийлгэнэ хэмээж буй. Тэгээд ч Ерөнхий сайд вакцин сайн дурынх гэчихсэн. Харин хөл хорионы хугацаанд төлөвлөсөн ёсоороо вакцинд хамруулж чадахгүй болсон учраас Эрүүл мэндийн салбарынхан вакциндаа хамрагдахыг уриалж бас шаардаж эхлээд буй. Гэхдээ иргэддээ мөн чанарыг ойлгуулахын оронд загнаж, зандарч буйд хүмүүс сэтгэл дундуур байна. Тухайлбал, Б.Болдсайхан эмч баян айлын эрх хүүхдүүд шиг вакцин шилж, голлоо хэмээсэн бол ХӨСҮТ-ийн Эрчимт эмчилгээний тасгийн эрхлэгч Ц.Чинбаяр бараг л даварсан ард түмэн гэчихэв.  Мэдээж, нийт иргэдээ вакцинжуулалтад хамруулах төр, засгийн хүслийг ойлгож байгаа ч сайн дурынх гэчихээд элдвээр хэлж, цоллож буйд хүмүүс “Вакцин хийлгээгүй иргэдээ бага загнана уу” гэцгээж байна.

Үүний оронд Хятадын, Оросынх ч бай вакцинжуулалтад хамрагдах нь ямар ач холбогдолтой, өөрт болоод өрөөлд ямар эрсдэл дагуулах, ямар өвчтэй хүмүүс ямар вакцин хийлгэж болох, жирэмсэн, хөхүүл эхэд аль нь тохиромжтой зэрэг мэдээллийг сайтар өгснөөр энэ бүхнийг шийдэж болно. Учир нь, иргэдийн ухамсар тэгтлээ доройтоогүй гэдэгт найдах учиртай юм. 

У.Тэргэл