Ерөнхийлөгчийн сонгууль эхлэж байгаа энэ үед парламентын суудалтай дөрвөн намын нэг АН тамга тэмдгийн асуудлаа шийдэж чадаагүй байна. Уг нь үе үеийн дарга нарынх нь барьж байсан, С.Эрдэнэ даргын Д.Туваанд хадаг тавин шилжүүлсэн тамгыг өдгөө О.Цогтгэрэл барьж байгаа. Гэсэн ч өмнөх дарга С.Эрдэнэ уг тамгыг үрэгдүүлсэн хэмээн худал материал бүрдүүлээд дахин өөр тамга хийлгээд байгаагаас энэ хэрүүл эхлэлтэй. Уг нь С.Эрдэнийн барьж байгаа энэ тамгыг хүчингүй гэсэн шүүхийн захирамж гарсан байдаг ч С.Эрдэнэ нар дахин гомдол гаргаад байсан юм.

Энэ шүүх хурлын тов хэзээ гэдэг нь товлогдохгүй хэд хэдэн удаа хойшилж байсан ч Ерөнхийлөгчийн сонгууль эхлэж байгаа энэ өдрүүдэд шүүх хурлыг гэнэт товложээ. С.Эрдэнийн гомдлоор О.Цогтгэрэлийн тамгыг хүчинтэй эсэхийг шүүх хурал өнөөдөр товлогджээ. Уг нь хууль ёсоор шүүх хурлын товыг хариуцагч талуудад гурваас дээш хоногийн өмнө мэдэгдэх ёстой байдаг. Харин энэ удаагийн хурлыг хариуцагч тал болох О.Цогтгэрэл нарт дөнгөж өчигдөр дуулгажээ.

Хамгийн хачирхалтай нь гэнэт товлосон шүүх хурлын бүрэлдэхүүнийг мөн л гэнэт сольсон байгаа юм. Энэ хурлын бүрэлдэхүүнд байсан Г.Билгүүн шүүгчийг сольж, түүний оронд Тунгалагсайхан шүүгчийг бүрэлдэхүүнд багтаажээ. Тунгалагсайхан шүүгч нь уг нь энэ хэрэгтэй ашиг сонирхлын зөрчилтэй байж мэдэхээр байгаа юм.

Учир нь, түүний охин Б.Билгүүнээ нь С.Эрдэнэ нарыг төлөөлдөг Ч.Өнөрбаяр хуульчийн дотнын хүн. Хамт ажиллаж байсан, багш шавийн холбоотой хүмүүс. Мөн Ч.Өнөрбаярыг Ерөнхийлөгч Ц.Элбэгдоржийн хуулийн бодлогын зөвлөхөөр ажиллаж байх хугацаанд Тунгалагсайхан нь шүүгчээр томилогдож байлаа.

Эндээс харахад АН-ын тамга тэмдгийн маргааныг С.Эрдэнэ нарын талд хүчээр шийдэх гэж байна гэж хардах үндэслэл байгаа юм. Ч.Өнөрбаяр нь гомдол гаргасан тал буюу С.Эрдэнэ нарын АН-ын Ерөнхий нарийн бичгийн дарга гэсэн албан тушаалтай байгаагаас харахад шүү дээ.

С.Сүлд