Монгол Улсын Ерөнхийлөгчийн сонгуулийн тухай хуулийн дагуу УИХ-д суудалтай намууд нэр дэвшигчээ тодруулаад буй. Харин Ардчилсан намын ХОЁР нэр дэвшигчийн хэн нь чухам Ерөнхийлөгчийн сонгуульд өрсөлдөх эрхтэй болох нь өдгөө олны анхаарлын төвд байна. 

Тэгвэл нийслэлийн Ардчилсан намын дарга, Хотын дарга асан Э.Бат-Үүл тэдэнд зөвлөгөө өгчээ. Тэрбээр "СЕХ-нд С.Эрдэнэ, Н.Алтанхуягийн нэр очсон нь манай намд маш ашигтай торгон мөч шүү. Хоёр залуу дарга тохироод хоёр нэр дэвшигчээ хооронд нь хэний нэр үлдэх вэ гэдгээр шодуул, эсхүл сугалаа татуул. Төрийн гурван өндөрлөг нэг намын гарт орвол М.Тулгат, Ц.Цогтгэрэлийг шүүх бүртгэхгүй 2024 он хүргэнэ шүү" хэмээсэн  байна.

Зарим улстөрч, хуульчдын хэлж буйгаар, С.Эрдэнийн гэх Ардчилсан нам УИХ-д төлөөлөлгүй учир нэр дэвших боломжгүй гэж тайлбарлаж байгаа. Ямартай ч, ирэх бямба гараг гэхэд аль намын нэр дэвшигчийг Сонгуулийн ерөнхий хороо албан ёсоор бүртгэсэн эсэхээ эцэслэн зарлана. Тэр хүртэл хүлээх л үлдлээ.   

Б.Баатар