Ерөнхийлөгчийн сонгуульд нэр дэвшигчид Сонгуулийн ерөнхий хороонд материалаа өглөө.

ХҮН-ын дарга Т.Доржханд “Морин цагт багтаагаад нэр дэвшигчийнхээ материалыг хүргэж өглөө. Өнөөдрийн энэ үйл явдал Монгол Улсын төрийн түүхэнд маш чухал үйл явдал. Өнөөдрөөс эхлэн сонгуулийн мөрийн хөтөлбөрийн үйл ажиллагаагаа албан ёсоор эхлүүлж байна. СЕХ нэр дэвшигчийг бүртгэсэн эсэхээ гурав хоногийн дараа мэдээлэл өгнө.

Бидний хувьд холбогдох баримт бичгээ хуулийн дагуу хүргүүлсэн.

“Зөв хүн электрот” эвслийн хувьд иргэддээ амласан ёсоор энэ удаагийн сонгуулийг сонголттой сонгууль болгож өгсөн. Залуу хойч ирээдүйд гэрэл асааж чадах зөв хүнийг нэр дэвшүүлмээр байна. Нийгмээ хуваадаг биш эвлүүлдэг, холбоос гүүр нь байж чаддаг Ерөнхийлөгчийг нэр дэвшүүлэх ёстой. Оюун ухааны урдаа барих ёстой лидер байх ёстой. Ийм агуулгаар олон нийтээсээ сонгож, хамгийн их санал авсан хүн нэр дэвшсэн.

Монгол Улс ямар ч тохиолдолд хуулиа дээдэлдэг, хуульдаа захирагддаг байх ёстой хуулийн өмнө эрх тэгш байхыг бид хүсэж байгаа. СЕХ-ны хувьд хуулийн дагуу ажиллаж, шийдвэрээ гаргах ёстой. СЕХ-г хуулийн дагуу ажиллахыг шаардах болно" гэлээ. 

А.Сүх