УИХ дахь АН-ын гишүүд Төв талбайд өлсгөлөн зарласантай холбоотойгоор улстөрч эрхмүүд байр сууриа илэрхийлжээ.

БНН-ын дарга Б.Жаргалсайхан: “АН-ын хувьд Ерөнхийлөгчийн сонгууль зүүд зэрэглээ болно гэж хэлээд байсан даа. АН-ын нэр дэвшигчдийг бүртгэхгүй, дотоод асуудлаа шийд гэсэн зөвлөмж төрийн байгууллагуудаас өмнө гэж хэлээд байсан.  Ерөнхийдөө ийм зүйл болно гэдэг урьдчилсан дүр зураг гарчихсан байлаа. Гэтэл хоёр даргатай, хоёр намаас нэр дэвшигч тодруулаад монгол төрийг дарамталж байна. УИХ-ын гишүүд өлсгөлөн зарлана гэхээсээ өмнө С.Эрдэнэ, О.Цогтгэрэл хоёр уулзаад нэг нэр дэвшигчээ зүтгүүлсэн бол асуудалгүй байлаа. Аль нэг талыг хүлээж авбал бас л гомдол тэмцэл гарах байв. Одоо Х.Баттулга эмх замбараагүй байдал үүсгэх, Онц байдал тогтоох гэж оролдох болов уу. Ерөнхийдөө бол МАН төрийн эрхийг хууль бусаар авах гэж байна гэсэн нэрийн дор дайрах нь л дээ. Эмх замбараагүй байдал улс оронд тогтворгүй  нөхцөл байдал, өвчин эмгэг л авчирна. Нөгөө талаар хариуцлагаас зугтаах боломж олгох магадлалтай. Юу тарина түүнийгээ хураана гэдэг шиг “Ингэх гээд байсан юм” гэжээ.

АН-ын гишүүн, Ерөнхий сайд асан Р.Амаржаргал: Өлсгөлөн зарлаж ард түмнийг энэ хүнд үед бухимдуулдаг нь буруу

Өлсгөлөн зарлахад хүрсэнд тун харамсаж байна.  Хүн хэлээрээ гэдэг хэрвээ эр зориг, сэтгэлийн тэнхээ, хат байвал эвлэлдээд учраа олцгоох ёстой байсан. Ухаантай нь трүүлж буулт хийдэг гэдэгт би гүнээ итгэдэг. Надаас хамаарах юм байвал би бэлэн. Өлсгөлөн зарлаж, ард түмнийг энэ хүнд үед бухимдуулдаг нь буруу. Эрүүл саруул ухаанаар асуудлыг хоёр талаасаа хэлэлцэж, нэгдсэн нэг ойлголтод хүрэх нь ардчиллын төдийгүй ард түмний язгуур эрх ашигт нийцнэ. Эв нэгдлээр л ардчиллаа хамгаална шүү дээ.

АН-ын гишүүд бид уучлахгүй

Ардчилсан Эмэгтэйчүүдийн холбооны тэргүүн, УИХ-ын гишүүн С.Одонтуяа, тус холбооны зөвлөх, УИХ-ын гишүүн асан З.Нарантуяа  “АН-ын 200 орчим мянган гишүүний дэмжлэгээр нам удирдаж, төрийн өндөр албан тушаал хашсан болон хашиж буй эрхмүүд хувийн таагүй харилцаа, өс хонзонгоор толхилцсоор Ерөнхийлөгчийн сонгуулийн хүргэлээ. Сүүлийн 15 жилийн хугацаанд намын даргаар ажиллаж ирсэн Н.Алтанхуяг, З.Энхболд, С.Эрдэнэ, Ерөнхийлөгч Х.Баттулга болон Ерөнхийлөгч асан Ц.Элбэгдорж нар хэлэлцээрийн ширээний ард сууж, үүрэг хариуцлагаа ухамсарлах цаг иржээ. Тэгээд ч АН-ын хувь заяа тэднээс шалтгаалах болоод байна. Хэрэв тэд ойлголцож ялалт байгуулж чадах хэн нэгнийг Ерөнхийлөгчийн сонгуульд дэвшүүлж чадахгүй бол АН-ын гишүүд бид уучлахгүй. Дараа дараагийн ёс зүйн хариуцлага хүлээж байгаа “ хэмээн мэдэгдлээ.