УИХ дахь АН-ын бүлгийн гишүүд Сонгуулийн ерөнхий хороонд шаардлага хүргүүлж, хуулийн дагуу ажиллахыг хүслээ. Бүлгийн гишүүдийн зүгээс өнгөрсөн лхагва гарагаас эхлэн Төв талбай дээр өлсгөлөн зарлаад буй. 

Өчигдөр Сүхбаатар дүүргийн Эрүүл мэндийн төвөөс гишүүдийг хяналтад авчээ. Эмч нар Д.Ганбат, А.Адъяасүрэн, Ц.Туваан нарын биеийн байдал тааруу, өлсгөлөн зарлахыг зогсоох дүгнэлт гаргасан байна. Үүнтэй холбогдуулан УИХ-ын гишүүн Д.Ганбат өлсгөлөнгөө зогсоож, суулт хэлбэрээр үргэлжлүүлэхээр болжээ. Харин Ц.Туваан, А.Адъяасүрэн нарын хувьд өлсгөлөнгөө үргэлжлүүлэхээ мэдэгдэж гарын үсэг зурсан байна.

УИХ-ын гишүүн Д.Ганбат "Өнгөрсөн лхагва гарагт бид баримт материалаа авч ирэхэд үзээгүй шахуу байж хүлээж аваагүй. Үүнийгээ ойлгосон юм шиг байна. Мөн Захиргааны шүүх хуралдаж байгаа юм байна. Сонгуулийн ерөнхий хороо бүх байгууллагаасаа лавлагаа авч байгаа юм байна. Дахин нягталж байна гэсэн. Цаашид ямар шийдвэр гаргахыг нь мэдэхгүй байна. Хуулийн дагуу ажиллаж, сонгууль шиг сонгууль хийгээрэй гэж хүсэж байна. Ямар баримт материал бүрдсэн байгаа талаар асуусан. Одоогоор материал нь бүрдээгүй байна гэсэн" гэлээ. 

А.Сүх