Тэтгэврийн зээлгүй байсан ахмадуудад нэг сая төгрөгийг ирэх долоо хоногийн даваа гарагаас эхлэн олгохоор боллоо. Энэ талаар УИХ-ын дарга Г.Занданшатар “Иргэний тэтгэвэр барьцаалсан зээлийн төлбөрийг төрөөс нэг удаа төлөх тухай” хуулийг УИХ баталсан. Энэ хуулийг хэрэгжүүлэх журмын тухай хуулийг ч мөн баталсан.

Хуулийн дагуу 228.5 мянган иргэний зээлийг тэглэсэн. Хууль хэлэлцэх үеэр иргэд сонгогчид болон УИХ-ын гишүүдээс санал гарч, тэтгэвэрийн зээлгүй байсан ахмадуудад шударга бус байна. Тиймээс зээлгүй байсан ахмадууддаа байгалийн баялагийн үр шимийг хүртээх ёстой гэсэн санал гарсан. Өөрөөр хэлбэл Үндсэн хуулийн нэмэлт өөрчлөлтийн зургаадугаар зүйлийн хоёрт, байгалийн баялагаас ард иргэд хүртэх ёстой гэсэн үзэл санааны дагуу зээлгүй байсан ахмадууддаа мөн урамшуулал олгохоор хууль батлагдсан. 

Харин ард иргэдээс коронавирусний цар тахлын үед тэтгэвэрийн зээлгүй байсан ахмадуудад нэг сая төгрөг мөнгөжүүлж олгох тухай асуудлыг хуулийн дагуу хэрэгжүүлж өгөхийг хүсэж байна. 

"Иргэний тэтгэврийг барьцаалсан зээлийг төлбөрийг төрөөс нэг удаа төлөх тухай” хуулийн дагаж мөрдөх журмын дагуу нэг сая төгрөг хүртэл дүнтэй үнэт цаасыг эзэмшүүлж, үүнийг тавдугаар сарын 21-ны өдрөөс мөнгөжүүлж эхлэхээр заасан. 

Хуулийн нэгдүгээр зүйл тэтгэвэрийн зээлгүй ахмадуудад нэг сая төгрөгийн ваучир олгож, түүнийгээ мөнгөжүүлнэ. Харин дөрөвдүгээр зүйлд нэг сая төгрөг хүртэлх зээлтэй байсан ахмадуудын зөрүүг олгохоор заасан. Өөрөөр хэлбэл 500 мянган төгрөгийн зээлтэй байсан ахмад 500 мянган төгрөг, 600 мянган төгрөгийн зээлтэй байсан ахмад 400 мянган төгрөг авна гэсэн үг юм. Гэхдээ энэ нь 2019 оны арванхоёрдугаар сарын 31-ний өдөр хүртэлх хугацаанд зээлтэй байсан ахмадуудад болон зээлгүй байсан ахмадуудад хамааралтай.

Үүнийг Салхитын мөнгө, алтны ордыг эдийн засгийн эргэлтэд оруулсан орлогоос төрд ногдох өгөөжийг барьцаалан үнэт цаас гаргах замаар “Эрдэнэс Монгол” ХХК, “Эрдэнэс силвер ресурс” ХХК 220 тэрбум төгрөгийн орлого олж, байршуулсан байна.

194 мянган ахмад тэтгэвэрийн зээлгүй байсан бол 43 мянган ахмад нэг сая хүртэл төгрөгийн зээлтэй байсан. Зээлгүй байсан ахмадуудад нэг сая төгрг харин зээлтэй байсан ахмадуудад зөрүү мөнгийг нь олгоно. Энэ мөнгө Монголбанканд байршисан учир хуулиа хэрэгжүүлж иргэдэд олгохоор боллоо. Энэ ажлыг ирэх долоо хоногийн даваа гарагаас эхлүүлнэ" гэв. 

Б.Баатар