УИХ-ын дарга Г.Занданшатар Төв талбай дээр өлсгөлөн зарлаж байгаа УИХ дахь АН-ын бүлгийн гишүүдийг өрөөндөө урилаа. УИХ-ын дарга Г.Занданшатар тэдгээрт хандаж "Асуудлыг эв зүйгээр шийдье. Та бүхнийг өрөөндөө урьж байна. Асуудлыг хамтдаа ярилцаад шийдье. Ажлын хэсэг байгуулж, шийдвэрлэе. Ард түмнийг цар тахалтай байхад турхирч, жагсаал цуглаан болгох гэж байна. Та бүхэн өлсгөлөнгөө зогсоохгүй бол би хамт Сүхбаатарын талбай дээр өлсгөлөн зарлая.  Буутал чинь хамт байя. Угтаа бол та бүхний тавьж байгаа шаардлага бол танай намын дотоод асуудал шүү дээ" гэжээ.

Төв талбайд гурав дахь өдрөө өлсгөлөн зарлаад буй гишүүдээс Д.Ганбат, А.Адъяасүрэн, Ц.Туваан нарын биеийн байдал тааруу байна. Тиймээс эмч нар зогсоо гэдэг шаардлага тавьсан ч тэднээс Д.Ганбат гишүүн өлсгөлөнгөө суулт болгон, харин бусад нь үргэлжлүүлэхээр болсон юм.  

УИХ-ын даргын ийн болгоомжлох нь учиртай аж. Маргаашаас хөл хориог сулруулна. Энэ цагт АН-ын гишүүд нийслэл болоод орон нутагт нэгэн зэрэг жагсаал цуглаан зохион байгуулахаар бэлтгэл ажлаа хангаж байгаа. Энэ бүхний ард Ерөнхийлөгч Х.Баттулга бий гэх мэдээлэл явж эхэлсэн. Хэдийгээр хөл хориог сулруулж байгаа ч энэ нь цар тахлын ард гарлаа гэсэн үг биш. Гэтэл үүнтэй зэрэгцэн хаа сайгүй жагсаал цуглаан өрнөөд эхэлбэл энэ улс орон яах билээ. Тиймээс УИХ-ын дарга сэтгэлээ чилээж суух нь зүйн хэрэг болж байна.

У.Тэргэл