Ардчилсан нам хэдийнэ хоёр хуваагдаж, хоёр даргатай болсон. Тэд Ерөнхийлөгчийн сонгуульд өөр өөрсдийн талаас нэр дэвшигчээ бүртгүүлэхээр СЕХ-нд хандсан ч бүртгэж авахаас татгалзсан. Улмаар УИХ дахь Ардчилсан намын бүлгийн гишүүд шударга ёс алдагдаж, ард түмний сонгох сонгогдох эрх зөрчигдөж байна хэмээн үзэж, Төв талбай дээр суулт зарлаад дөрөв хонож байна. Тэдний тэмцлийг дэмжиж орон нутгийн гишүүд дэмжигчид нь ч мөн өлсгөлөн зарлана гэдгээ мэдэгдээд буй. Тэгвэл С.Эрдэнийн гэх Ардчилсан намынхан ч мөн өнөөдөр намын байрныхаа гадна жагсаал зохион байгуулав. Хоёр талд тэмцэл өрнүүлж буй Ардчилсан намынханы байр суурийг хүргэж байна. 

Н.Алтанхуяг: Бусдын үймээн самуунд автахгүй, тайван амгалан байхыг хүсэж байна

УИХ дахь Ардчилсан намын бүлгийн гишүүн Н.Алтанхуяг “Бид нэг намын дарангуйлал хэрээс хэтэрч, шударга ёс алдаж байгааг эсэргүүцэн тэмцэж байгаа. Гэтэл үүнийг мушгин гуйвуулж, Н.Алтанхуяг гэдэг хүн л Ерөнхийлөгчид нэр дэвшүүлсэн, дэвшүүлээгүй асуудал ярьж байна хэмээж байгаа нь өнөөх л шударга ёс алдагдаж байгаагийн тод жишээ болж байна.

Өнөөдөр хөл хорио суларсантай холбоотойгоор иргэд өөрсдөө талбай дээр хүрээд ирж. Ард иргэддээ хандаж хэлэхэд та бүхэн маань тайван амгалан байхыг хүсэж байна. Тэгэхгүй бол бусад нам эвслүүд бидний өлсгөлөн зарлаж байгаа нөхцөл байдлыг ашиглан зориудаар үймээн самуун болгох, түүнийгээ бидэнд хамаатуулахаар оролдож байна. Эрх баригчид ийм л шалтаг өгөхийг хүсэж байгаа учраас ард түмэн минь тайван амгалан байхыг хүсэж байна. 

Өнөөдөр Ардчилсан намын хүмүүс Ардчилсан намынхаа гишүүдийн эсрэг зогсож байна гэдэг бол тэд барьцаанд орсны л илрэл юм. Миний бодлоор өөрийнхөө хар амийг бодсон хэсэг бүлэг хүн л Ардчилсан намын нэрийг барьж, худал хэлж өнөөдрийн энэ нөхцөл байдлыг үүсгэж байна" гэдгийг онцоллоо.

М.Тулгат: Ардчилсан нам устах гэж байхад юун өвчин, юун цар тахал

С.Эрдэнийн гэх Ардчилсан намынхан өнөөдөр намын байрныхаа гадна мөн жагсаал зохион байгуулж, эсэргүүцлээ илэрхийллээ. Энэ үеэр Ардчилсан намын дарга М.Тулгат "Ардчилсан нам өнөөдөр устах аюулд орж байна. Баруун төвийн чиг баримжаатай, хүний эрх, эрх чөлөө, хувийн өмчийн төлөө зогсдог намыг зүүнтнүүд, эрх мэдлийн төлөө юугаа ч үл хайрдлах албан тушаалтнууд булааж авахыг санаархаж байна.

Өчигдөр УИХ-ын дарга Г.Занданшатар төв талбайд өлсгөлөн зарлаж байгаа гишүүдтэй уулзаж, ажлын хэсэг байгуулахаар болсон. Ардчиллын эрх ашгийг хэдэн гишүүн ордон дотор цай ууж байгаад шийдэхийг хэн ч хүлээн зөвшөөрөхгүй.

Ерөнхийлөгч, УИХ-ын дарга, МАН нь нэгдэж байгаад Ардчилсан намыг унагаах оролдлого хийж байна вэ. Төрийн өндөр дээд эрх мэдэлтэн албан тушаалаа ашиглаж, Ардчилсан намын гишүүдийн итгэл үнэмшлийг нурааж байна.

Дээд шүүх яагаад ажлаа хийхгүй байгаа юм. Ардчилсан намын гишүүдийг төөрөгдүүлж байна. Монголын ардчиллал аюулд орж байна. Төрийн байгууллагууд хэнээс ч хараат бусаар хуульд захирагдах журмын дагуу ажлаа хиймээр байна.

УИХ-д суудалтай Ардчилсан намын гэх тодотголтой 11 гишүүн хууль дүрэм, намын дотоод журмыг сахих ёстой. Хуулийн дээгүүр хэн ч алхах ёсгүй. Өнөөдрийн энэ нөхцөл байдлыг үүсгэж байгаа У.Хүрэлсүхийг буруутгаж байна. Өөрийн эрх ашгийн төлөө Ардчилсан намыг баллуурдах эрх байхгүй. Ардчиллын үнэт зүйлс, зарчим ярьдаг хүмүүс одоо болно шүү дээ гэж хэлж байна. Тэд одоо босох цаг нь болсон гэдгийг хэлж байна.  Өнөөдөр монголын ардчилал аюулд орж, Ардчилсан нам устах гэж байна. Ардчилсан нам устах гэж байхад юун өвчин, юун цар тахал. Бид тэмцэх болно" гэлээ. 

Б.Баатар