Монгол Улсын Ерөнхий сайд Л.Оюун-Эрдэнэ Чингэлтэй дүүргийн IV хороон дахь тавдугаар сургууль дээр байрлаж буй дархлаажуулалтын цэгт ажиллав. Тус цэгт өчигдрөөс тус дүүргийн 65-аас дээш насны иргэдэд “Спутник-В” вакцинаар дархлаажуулалт хийж буй юм.  Вакцинжуулалтын эхний өдөр иргэд ачаалал үүсгэж, цагдаа нар ирж зохицуулж байсан бол өнөөдрөөс хэвийн байдалдаа оржээ. Нийслэлийн хэмжээнд 65-аас дээш насны 20,800 хүн бүртгэлтэй байдаг юм. 

“Спутник В” вакцины хоёрдахь тунг 21-90 хоногийн хугацаанд хийх эмнэлзүйн заалттай, нийлүүлэлтийн гэрээ хэлэлцээрийг амжилттай хийж байгаа. Товлосон хугацаандаа амжиж, татан авна гэдгийг Эрүүл мэндийн сайд С.Энхболд хэллээ.

Дөрөв, тавдугаар сард зорилтот бүлгийн хүн амаа вакцинжуулалтад үе шаттай хамруулах Засгийн газрын зорилт биелж, төлөвлөснөөс 10 орчим хоногоор түрүүлж байна. Үүнд иргэдийн идэвх, эрүүл мэндийн салбарын ажилтан, албан хаагчдын хичээл зүтгэл чухал үүрэгтэй гээд Ерөнхий сайд Л.Оюун-Эрдэнэ тэдэнд талархал илэрхийлэв.

БНХАУ-ын Синофарм үйлдвэрийн “VeroCell” вакциныг ДЭМБ өчигдөр  бүртгэсэн юм. Үүнээс өмнө дипломат, найрсаг харилцааны хүрээнд БНХАУ-аас вакцины нийлүүлэлтийг амжилттай хийж, иргэдээ “цонх үе”-ийг ашиглан дархлаажуулсан нь томоохон амжилт боллоо гэж Ерөнхий сайд дүгнэлээ.