С.Эрдэнийн гэх Ардчилсан намын гишгүүд өнөөдөр намын байрныхаа гадна талбайд жагсаал зохион байгуулсан талаар бид өмнө нь мэдээлсэн. Энэ үеэр Ардчилсан намын ерөнхий нарийн бичгийн дарга Н.Өнөрбаяр “Өнөөдөр хэсэг бүлэг хүмүүс Ардчилсан намыг устах гэж оролдож байна. МАН-ын дарга У.Хүрэлсүх гэж хүн хумсаа нуусан муур байсныг бид мэдлээ. Энэ хүн үргэлж монголын ардчилалд дайсагнаж ирсэн түүхтэй. Монгол төрийн тэргүүн болохын тулд ардчиллыг устгахад бүх хүчээ тавьж байна. Үүний эсрэг Ардчилсан нам тэмцэх болно. 

У.Хүрэлсүхэд хандаж хэлэхэд чи амжихгүй шүү. МАН, эрх баригчид ардчиллын үзэл санааг хэзээ ч бөхөөж чадахгүй” гэдгийг хэлсэн. Түүний энэхүү мэдэгдэлд УИХ-ын гишүүн, УИХ дахь МАН-ын бүлгийн дэд дарга Ж.Сүхбаатар байр сууриа илэрхийллээ.

Тэрбээр "1. Ардын нам Ардчилсан намыг “устгах” ямар ч алхам хийгээгүй, хийхгүй, хийх боломжгүй шүү дээ!

2. Ардчилсан нам бол Монголын өнөөгийн улс төрийн тогтолцооны гол тулгуур баганын нэг. Энэ хүч унавал нөгөө багана болох Ардын намд ч хортой нөлөөлнө. Ардчилсан нам дүрэмтэй, үзэл санаа, дүрэмдээ захирагдсан эвтэй, гишүүд нь сахилгатай, төрийг засаглах чадавхтай байхыг хүснэ, би.

3. С.Эрдэнэ даргатай гэх АН, О.Цогтгэрэл даргатай гэх АН буй болоод удирдлага-зохион байгуулалт, гишүүд дэмжигчид нь бодитойгоор хуваагдаад байгаад МАН-ыг эрх баригч хүчнийх нь хувьд буруутгах нь намын доторх эрх мэдлийн тэмцэлдээ аль нэг тал нь давуу байдал олж авах гэсэн улс төрийн акц гэж үзэж байна. Үнэндээ Ардчилсан намыг “тамга, бүртгэл” л хуваагаад байна уу, эрх ашгийн (Элбэгдорж, Баттулгын) зөрчил мөргөлдөөн хуваагаад байна уу, эсхүл Ерөнхийлөгчийн сонгууль л зөрчилдүүлээд байна уу?!

4. Миний хувьд УИХ дахь АН-ын бүлгийн гишүүддээ хүндэтгэлтэй хандаж байгаа. Гэхдээ юун түрүүн намын үндсэн дүрэм, хуулийн хүрээнд үүссэн дотоод асуудлаа улс төрийн соёл, зөвшилцлөөр шийдэхийг уриалж байна. Сонгуульд орохоос өмнө Ардчилсан нам намаа элдэв маргаангүй цэгцлэх, бэлтгэх ёстой байсан шүү дээ!

5. Мэдээж МАН-ын зарим гишүүд АН-ын дотоод асуудлын талаар өөр өөрийн байр сууриар хандаж байгаа. Гэлээ гээд үндсэн суурь асуудал нь АН-ын дотоод асуудал тул тэр хүрээнд өөрсдөө үүссэн маргаантай нөхцөл байдлаа зохицуулах нь шударга бөгөөд зохистой" гэжээ. 

Б.Баатар