МАХН-аас гаргасан "Шударга сонголт-МАХН" гишүүнчлэлээ сэргээх аян улс орон даяар идэвхитэй явагдаж байна. Аяны хүрээнд нийслэлийн есөн дүүргийн 300 гаруй хүн гишүүнчлэлээ сэргээгээд байсан билээ. Харин өнөөдөр МАН-ын Чингэлтэй дүүргийн үүрийн 250 гишүүн МАХН-ын гишүүнчиллээ сэргээн батлахаа гардан авсан байна.Чингэлтэй дүүргээс гишүүнчлэлээ сэргээж байгаа 250 хүнийг төлөөлж ард түмний зураач, Эгэл баатар Д.Эрдэнэбат, Г.Энхтөр, Д.Батжаргал нар МАХН-ын Ерөнхий нарийн бичгийн дарга Г.Шийлэгдамбад анкетуудыг гардуулан өгсөн юм.
Д.Эрдэнэбат анкет гардуулан өгөхдөө “Манай хүүхдүүд зургадугаар сарын 1-ний өдөр Ерөнхийлөгч асан Н.Энхбаяртайгаа хамтдаа баярладаг байлаа. Гэтэл энэ жил Н.Энхбаярыг хөлийг нь гозолзуулаад аваад явсан. Ер нь бид шударга сайхан нийгмийн төлөө МАХН-даа гишүүнчиллээ сэргээгээх шийдсэн. Бидний эцэг, эх МАХН-ын гишүүн л байсан. бид ч тийм л байна” хэмээн хэлсэн юм. Харин Ерөнхий нарийн бичгийн дарга Г.Шийлэгдамба гишүүнчлэлээ сэргээж байгаа гишүүдэд намдаа тавтай морилохыг уриад “Бид бүгд хамтдаа шударга ёсыг цогцлоох үүрэгтэй. Шударга нийгмийн төлөө МАХН-тайгаа хамтран зүтгэхээр ирж байгаа гишүүддээ баярлалаа” гэсэн юм.
Б.Золбоо
