Монгол Улсын Ерөнхийлөгчийн сонгуульд өрсөлдөх нэр дэвшигчид эхнээсээ баталгаажаад буй. ХҮН "Зөв хүн электорат" эвслээс нэр дэвшигч Д.Энхбатын материалыг Сонгуулийн ерөнхий хороо хүлээн авч, өнгөрсөн амралтын өдөр албан ёсоор бүртгэж, үнэмлэх олгох шийдвэр гаргасан.  

Энэ даруйд тус эвслээс мэдээлэл хийж, албан бус "сурталчилгаагаа" эхлүүлсэн. 

Тодотговол, ХҮН "Зөв хүн электорат" эвслээс Монгол Улсын Ерөнхийлөгчийн сонгуульд нэр дэвшигч Д.Энхбат "Ерөнхийлөгчийн сунгаанд нэр дэвшүүлэхээр дэмжсэн та бүхэнд талархаж буйгаа илэрхийлж байна. Нэг зүйлийг онцлон хэлэхэд, нэр дэвшүүлэх явц нэг намаас хальж сонгуульд оролцох боломжийг бүрдүүлж өгч байна. Монголын төрийн гурван институцэд Монголын шилдэг хүмүүсийг урьж ажиллуулж, нийгмийн сайн сайхны төлөө зүтгэх болно. Намайг дэмжиж байгаа иргэд улс орныхоо төлөө ажиллаж чадах хүмүүс нэгдэж ажиллахыг хүсэж сонгож байгаа гэж бодож байна. Бид Монгол Улсыг хөгжүүлэх гарцыг хамтран зүтгэгчидтэйгээ бий болгох болно. Та бүхний итгэлийг алдахгүйн тулд бүх хүчээ дайчлан ажиллана.

Монгол Улсын төрийн тэргүүн гэдэг аль нэг намын төлөөлөл байх албагүй. Бидний хувьд Засгийн газрын өмнө орж ажил хийдэггүй, шуналгүй, хулгай хийж, худал хэлсэн түүхгүйгээр, ирээдүйг тодорхойлох зорилт тавьсан. Сонгуулийн сурталчилгааны хугацаанд намын үзэл баримтлалыг яагаад дэмжих болсон бэ гэдгийг дэлгэрэнгүй тайлбарлана. Эрх бүхий намын тухайд байх л зүйл. Гэхдээ хэлбэр бол цаг хугацаа. Би энэ эвслийг сонгосны учир бол Монголын гурван сая хүн нийтээрээ эх орныхоо хөгжилд, нийгмийн амьдралд улс төрийн хүчний зүгээс оролцох боломжтой юм байна гэдгийг ойлгосон. Би нийгмийн амьдралд идэвхтэй оролцдог. Улсын их хурлын гишүүнээр ажиллаж байсан туршлагатай. Тиймдээ ч аль нэг намыг сонгоогүй. Иргэдийн байр суурь, хандлагаас шалтгаалж энэ эвсэлд нэгдсэн. Өнөөдөр оролцоог л тэргүүн эгнээнд тавих шаардлагатай болоод байгаа юм. Хүн бүр оролцохгүй бол гаслаад л байна. Тиймээс хүн бүрийн оролцоо чухлыг таниулахыг зорьж ажиллах болно" гэдгээ амлаад амжсан. 

Дээрх мэдээллийн дараа нэр дэвшигчийн эхнэрийн хамт гудамжаар алхаж буй зураг цахим сүлжээнд дэлгэгдэв. Энэ нь олны анхаарлыг татаж, магтаал, шүүмжлэлийн дундуур хоёр өдөр "хөвөв".

Тухайлбал, "Энэхүү гэрэл зураг нь энгийн мэт харагдах боловч барууны улстөрчдийн сонгуулийн суралталчилгааг дуурайж, хуулбарласан хувилбараар олон нийтийн тархийг угаалаа", "Сонгуулийн сурталчилгааны хуулийн хугацаа эхлээгүй байхад яарч сандран эхлүүллээ", "Д.Энхбатын эхнэр эгэл даруу сайхан бүсгүй", "Үлгэр дуурайлал болохоор сайхан гэр бүл юм" гэгчлэнгээр иргэд цахим орчинд байр сууриа илэрхийлж байна. 

Ямартай ч ХҮН "Зөв хүн электорат" эвслээс нэр дэвшигч Д.Энхбат энэ мэтээр олны анхаарлыг татаж, "реклам"-аа цацаад эхлэв бололтой. 

Дашрамд өгүүлэхэд, “Форум” нэвтрүүлгээр олны танил болсон Монголын цахим технологийн анхдагч Дангаасүрэнгийн Энхбатын гэргийг Дашдаваагийн Оюунцэцэг гэдэг.  Д.Оюунцэцэг нь хуучин нийгмийн үед төлөвлөгөөний комисст ажиллаж байсан, англи, орос хэлтэй нэгэн аж. Ууланд алхагчдын “ХАЙРХАН аялагч клуб”-ийн гишүүн тэрбээр 2014 онд Кавказын ууланд оршдог далайн түвшнээс дээш 3820 метр өндөртэй Пик МНР (Монгольская Народная Республика) оргилд авиралт зохион байгуулж байсан байна.

Б.Баатар